Ayso ma Zakay
19
Ayso Yerikoğa girı andan ötbarbur.
2 Anda Zakay diğen kişor volcı,
u shuy yığqucıniği dambası ma bar kişordır.
3 U Ayso kem volğanını öşürğür ede tıñnıncıçı,
aniği boynu-süzü kiçi volğanniği,
u kişlerniği arasından öşürünmacı.
4 Eli volğanniği Aysonı öşürğine vulı u iline yügürbarı,
Ayso ötbarğusı yüründiği dağ vuxago dalorniği başına çıxbarcı.
5 Ayso aña yetgende,
orxarı öşarı aña “Ey Zakay,
daldan hasgen endiği.
Buğün Men siniği öyüñde oturğu keleğa” edici.
6 Zakay daldan hasgen engilı,
Aysonı söyünçla zelici.
7 Munı görğüci yogosı honañlı “U xollanqına vulı gunıhacıniği öyüne girır ma!”
edici.
8 Zakay tixinqalı Rabğe “Ey Rab,
miniği neychanımniği yarımını men inci yox kişlere vibur.
Kem volsıdan men nañkirix xunığan volsa,
men artuğunda döt gez yandırbiğür” edici.
9 Ayso aña “Buğün dacuu etgusı bu öye enci,
bu kişçüx hem İbrahiminiği xuurınıdır.
10 Adam Oğlı yalıtılğan kişlernı işdeme ma cuulıma gelci” edici.
Sadiq carıxcı bifañı
11 Ular bu işlernı diñnengende,
Ayso ulıra bifañ bur yenşıberci,
neğe dese U Yerusalime yaxılıbarcı,
hem da kişler Xudaniği Vañgosı dego görünga ede sumurlıba.
12 İnci U beli edici:
“Bur guyzu'or xoñshoñ oturğusı qañını alqalı yangiğür ede,
yırıx zimenora varğan yola çıxmış.
13 Yola çıxqandan ili u izıniği carıxcılarından on kişnı yığgilı,
ulıra ax helli on minaa virı ‘Men yangiğünçüxor bu çosıla satıx etdığı’ edimiş.
14 Ese aniği xalqısı anı yöhgirba.
İnci ular ‘Bu kişçüxnı ipsemniği iştımdan höküm sürdürqusı gimur’ ede,
aniği ardına xeberci bur dohulıyüremiş.
15 U guyzuçüx xoñshoñ otarı yangelğende,
izı helli verğen carıxcıçüx çosı satıx itı nisgor cıñnığanını bilqusı gilı,
ularnı izıniği yanına çıxrıtdırgimiş.
16 İlicüğündiği gilı ‘Xoca,
siniği bur minañ on mina cıñnacı’ edimiş.
17 Xocası aña ‘Shunduna,
yaxşı carıxcım!
Kiçicüğü işorda sen sadiq volğanniği,
sen on şehernı gollı’ edimiş.
18 Exincisı gilı ‘Xoca,
siniği bur minañ beş mina cıñnacı’ edimiş.
19 Xocası aña ‘Sen hem beş şehernı gollı’ edimiş.
20 Başqası burı gilı ‘Xoca,
siniği bur minañ bey,
men anı elşügün işine yığcı;
21 neğe dese sen xıddı kişor volğanniği,
men senden xorğacı;
sen izıñ qoymığanıñnı ahbırar,
exmeğanıñnı yığar’ edimiş.
22 Xocası aña ‘Ey yemen carıxcı,
izıñniği ağzıñdan çıxgelğen gahcıñla men sinı höküm etgur.
Men xıddı kişor volğanımnı,
izım qoymığanımnı men ahbarğusımnı ma exmeğanımnı men yığqusımnı sen bildu?
23 Ene sen miniği hellimnı neğe yinxañda qoygimacı?
Men gelğende anı lişisıla burlığı çıxırgelse volğa ma’ edimiş.
24 İnci xocası yanında tixingulıra ‘U bur minanı andan ahbarda,
anı on mina volğucığa verduğu’ edimiş.
25 Ular aña ‘Ey xoca,
aña on mina vara’ edimiş.
26 U inci ‘Men selere yenşağı:
keme volsa,
aña dağı artux verer;
keme yoxmısa,
anda volğanını hem ahbırar.
27 İzler iştından minı höküm sürdürqusı gelmeğen düşmenlarımnı ese muña başlıdiğide,
miniği gözüm ilinde ularnı carıduğu’ edimiş.”
Ayso Yerusalime girğanı
28 Ayso bularnı yenşı volqalı,
iline yürü Yerusalime çıxbarcı.
29 Zeytun dağdağı Betfacı ma Betaniyağa yetbarğur diğende,
u izıniği muritlarından işginı dohulıyüre
30 ulıra “Seler iliñdiği ağılçüxe var;
seler ağılçüxe girbığanda,
anda bağlanqan eşex qodaxor görer,
aniği iştına dağı bur kiş da mingen yoxdır.
Seler anı tişde yehlediği.
31 Qaysor selere ‘Anı nehme tişbur ri?’
ede sorsa,
seler ‘Rab anı keleba’ ede yenşı” edici.
32 Dohulı varğucılar çıxbarı,
u işçüx Rab izlere yenşıberğen kemaçüx volğanını görci.
33 Ular qodaxçüxnı tişgende,
aniği iyisı ulıra “Seler bu qodaxnı nehme tişbur ri?”
ede sorcı.
34 Ular aña “Rab anı keleğa” edici.
35 Ular qodaxçüxnı Aysoniği yanına yehlegilı,
izlerniği xantırlarını qodaxçüxniği iştına örtbirı,
Aysonı aniği iştına mindirci.
36 U minı yürğende,
kişler xantırlarını yola çiyiberci.
37 Ayso inci Zeytun dağdan aşaxqa engen yola yaxılıbığanda,
muritları yogosı izler görğen heme kerametlere söyanı,
xıddı ünüla Xudağa hamd etme başlı
38 “Rabniği adıla gelğen Xoñshoña halqış volğı!
Asmanda salim,
bixicüğülerde şerifu volğı!”
edici.
39 Kişxoban arasından burı Fariseyler Aña “Mutalim,
muritlarıñnı bur öhre” edici.
40 Ayso ulıra “Men selere yenşağı:
ularniği ünü çıxgelmese,
bu daşlar da zıqırığa ra” ede cavap verci.
Ayso Yerusalime vulı yağlığanı
41 Ayso Yerusalime yaxılıbarğanda u şehernı görü,
aña vulı yağlacı.
42 U beli edici:
“Eş,
salime başlığan işlernı buğün sen da bur bilquse!
Ese çoxur anı siniği gözlarıñdan yaşırbur.
43 Siniği başıña belisgi günler geler:
düşmenlarıñ saña ilanı dam qurar,
ular sinı gorlar,
tönen-qırğından sinı qısdar.
44 Ular sinı ma siniği işiñdiği balılarıñnı dozıtar,
siniği işiñde daş iştında daş bur da qaldırmas,
neğe dese Xuda saña rehmet görğesgen zamannı sen olanmacı.”
Ayso satıxcılarnı eybadet-sarıdan qolığanı
45 Ayso eybadet-sarığa girı,
andağı satıxcılarnı qolıma başlacı.
46 U ulıra “ ‘Miniği öyüm dovu qılğusı öy volar’ ede piştibur;
seler ese anı çixcinlerniği oñası etmiş” edici.