Yox gohorniği niyitı
21
Ayso başını damnı öşürse,
bar kişler niyit yığqan xarığa izlerniği niyitlarını carıyüreğanını görci.
2 U da yox gohor aña sarıtiş hellia işgi cağıyüreğanını hem görci.
3 İnci Ayso “Men shıxoçüx selere yenşağı:
bu yox gohoçüx heme kişlere vaxqan da artux cağıyürecı.
4 Bu heme kişler izlerniği artqanından niyit çıxı cağıyüreci,
bu gohoçüx ese izığa dañnımığanından,
u izığa volğanornı ariçüx cağıyüreci” edici.
Axır zamandağı alyametler
5 Burisılar eybadet-sarını niçixli yaxçux daşla ma Xudağa qılğan hediyela yasışdırğanını yenşışqanda,
Ayso ulıra
6 “Seler görğanıña belisgi günler geler:
daş iştında daşor qalmas,
yogosını tadı qor-qora yürer” edici.
7 Ular Aysoğa “Mutalim,
bu işler qahalda volğa ri?
Bu işler çıxqur diğende nañ alyamet volğa ri?”
ede sorcı.
8 U “İyitdığı,
selernı kişler xunımağı.
Yarağor kiş Miniği adımla gilı ‘Men U idır’ ma ‘Zaman yaxılacı’ eder.
Ularniği ardına ireşme.
9 Seler vuruşlarnı ma lollanqanılarnı añnığanda xorğıma.
Bu işler aardı çıxqu keler,
ese axırı dego gelmes” edici.
10 Ardi U nene ulıra beli edici:
“Millet millete axqurlı xotgeler,
vañgo vañgoğa.
11 Yer cünkün terener,
yarağor zimende açlıx ma vınyı volar,
xorğunç işler volar,
asmandan cünkün alyametler hem volar.
12 Ese bu heme işlerden ili Miniği adımniği sebebinden ular selernı çutar,
zular,
eybadet-öylere ma banfañlıra colıberer,
hem da xoñshoñlarniği ma hökümcilerniği iline sürebırar.
13 Bu işler selere şehadet etgusı hurumor volar.
14 Eli etgenniği seler izıñlarnı niçixli axlağusını yiriğiñde ilyoxdan sumurlıma;
15 neğe dese Men selere gahcı ma aqıl viğür,
selere axqurlığan heme kişler aña çıdımas,
aña hem axqurlanmas.
16 Atınañ,
gagı-inilarıñ,
danışlarıñ ma dosdanlarıñ hem selernı chumay eter;
ular selerden burisılarıñnı üldürer.
17 Miniği adımniği sebebinden heme kişler selernı yöhgirer.
18 Ese selerniği başıñdağı saşlardan bur genzı da yoxqan volmas.
19 Seler zhılışqanıñla canıñnı cuular.
20 “Cunduylar Yerusalimnı gorlığanda,
anı yıxqusı vaxı yaxılığanını seler biler.
21 Şu vaxda Yehudayada volğucılar dağlıra qaş,
şeher işinde volğucılar andan çıxdıvar,
çelde volğucılar şehere girme;
22 neğe dese u günler heme pişteğen işler çıxqı ede,
chuu bolağusı günlerdır.
23 U günlerde boyağır qadınkişlere ma balı emdirğen qadınkişlere belyodır!
Bu zimen iştına ağır belyo ener,
bu xalqı başına qazap ener.
24 Ular qılış ağzıla carğınar,
heme milletlerniği arasına ularnı sürbırar.
Daşı milletler izlerniği zamanları dolğunçüxor Yerusalimnı ayax cüyüne basar.
25 “Günde,
ayda ma yultuslarda alyamet volar.
Zimen iştında deñiz ma çalğunlar qaynaşqanından milletler xosağı qızaşı uslar.
26 Kişler xorğıqalı ma dünyağa giğüsı işlere güyüqalı xudu varar,
neğe dese asmandağı hal-küşler yıxılınar.
27 İnci seler Adam Oğlıniği bulut işinde qudretla ma ulı şerifula giğüsını görer.
28 Bu işler çıxma başlığanda,
seler başıñnı damnıda düzçüx tixin,
selernı cuushu etgusı yaxılabur.”
29 Ayso ulıra bifañ bur qoyberci:
“Seler vuxago dala ma heme dallıra bur öşür.
30 Ularniği yahrıxları çıxgiğanını görğende ma,
yıy kozañ yaxılığanını seler bilir.
31 Eli volğan kema seler da bu işler çıxqanını görğende,
Xudaniği Vañgosı yaxılığanını hem bilir.
32 Men shıxoçüx selere yenşağı:
bu goñyındağı kişler dünyadan ötbarğunçüxor,
bu işler yogo çıxar.
33 Asman ma zimen ötbırar,
ese Miniği gahcılarım niçixli volsa ötbımas.
34 “Seler izıñlıra sugu et!
Edemese dozokey volğanıla,
zuylanı çalınqanıla ma bu hayatniği qımlarıla yiriğiñe yüx yüxliqular;
u gün selerniği iştıña hem lorcıxqı duzax kema enqular;
35 neğe dese u gün zimenniği iştında oturğan heme kişniği iştına ener.
36 Seler geşgünçüx iyitdığı,
seler bu heme çıxqusı işlerden bur qaşınqı ma Adam Oğlıniği ilinde bur tixiningi edede dovu qıl.”