Rutniği Kitabı
Elimelex zahsañıla Moğab zimene cılınbarğanı
1
Hakimler höküm sürğen goñyında,
İsra'il zimende açlıx volcı.
Anda kişor kinıla ma işgi oğlıla burlığı Yehudadağı Betlehemden Moğab zimene aardı oturma varcı.
2 Kişçüxniği adı Elimelexdır,
kinıniği adı Nağomi,
bur oğlıniği adı Maxlon,
nene burıniği adı Kilyon.
Ular Yehudaniği Betlehemdiği Efrata kişdır.
Ular Moğab zimene gilı anda oturcı.
3 Ardi Nağominiği güyüsı Elimelex kuxun volqalı,
Nağomi oğlı işgilaçüx qalcı.
4 Aniği oğılları Moğab qadınkişlerden kin alcı.
U qadınkişlerniği işgisından burıniği adı Orpadır,
nene burıniği adı Rut.
Ular anda on yıl kemasor oturcı.
5 Andan ardı Maxlon ma Kilyon işgisı da kuxun volcı,
inci Nağomiğe balası işgisı yoxqan ma güyüsı yoxqan volcı.
Betleheme yanbarğanı
6 Nağomi Moğab zimende RABniği İz xalqısına yiğüsı virı,
ulıra rehmet görğasganını anñnacı;
inci u oğlan-kinlarıla burlığı Moğab zimenden yanbarğur ede terenci.
7 U oğlan-kinlarıla burlığı iz oturğan yüründen garlanı,
Yehuda zimene yanbarğusı yola çıxcı.
8 Nağomi oğlan-kinı işgisına “Ya,
seler iñsılarniği palmañıña yanduğu.
Seler vañrınlıra ma maña açışqan kema,
RAB selere bur açışqı.
9 RAB sen işgisıña da çıxbarqusı zahsañda rahatlıx viği” edici.
İnci u oğlan-kinı işgisını mödeqalı,
ular ününı çıxarı yağlaşcı.
10 Oğlan-kinları aña “Ahıñ,
ipsem hem sila burlığı xalqıñniği yanına yanqur” edici.
11 Ese Nağomi “Ya qızlarım,
yanduğu.
Seler neğe mila burlığı varğur?
Miniği xosağımda nene oğıl volı,
ular selere erkiş volunqa ro?
12 Yanduğu qızlarım,
iñsılarniği yolıña varduğu.
Men inci xarıqalı kişe çıxbırınmığa.
Men izıma ümit var ede,
sodı maña güyü bur volqalı men oğıl işgi doğquse da,
13 ular çañnağunçüxor seler güyünga ro?
Seler ulıra vuqalı kişe çıxbarmi sıxlınqa ro?
Yarımığa,
qızlarım!
RAB minı belyola vurğanniği,
selerniği acılağıña vaxqan da miniği ağırdır” edici.
14 İnci ular nene ününı çıxarı yağlaşcı.
Orpa qaynasını mödeqalı garlanbarcı,
Rut ese Nağomiğa sürenci.
15 Nağomi Rutğa “Öşür,
siniği exingiñ izıniği xalqısıniği ma ilyahisıniği yanına yanbarcı,
sen hem aña ireşde yanduğu” edici.
16 Ese Rut “Minı siniği yanıñdan kañ garlaqıma,
siniği ardıña ireşgusından hem yandırqıma.
Sen qala varsa,
men hem qala varğur;
sen qada otursa,
men hem qada oturğur;
siniği xalqıñ miniği xalqım volar,
siniği Xudañ miniği Xudam volar.
17 Sen qada ülse,
men hem qada ülğür,
şu yerde minı gömgi.
Ülümden başqı nañ volsa minı senden garlandırsa,
RAB maña ceza ağırlığına endirği” edici.
18 Noğami Rutniği izıla burlığı varqusı gelğanını görğende,
aña heşbeşor edemacı.
19 U işgisı Betleheme yetgunçüx yolda yürci.
Ular Betleheme yetgende,
ularniği sebebinden şeherde doşı çıxcı.
Qadınkişler “Bu Nağomi ira mi?”
edeşci.
20 Nağomi ulıra “Minı Nağomia ede çıxrıma,
minı Marab ede çıxrı,
Küş-Çollanqucı maña acılıx köp verci.
21 Men mundan doliçüx çıxbarcı,
ese RAB minı quriçüx yandırgelci.
Seler minı neğe Nağomi çıxrabur ri?
RAB minı enkix gördürci,
Küş-Çollanqucı miniği başıma belyo endirci” edici.
22 Nağomi Moğabdağı oğlan-kinı Rutla burlığı Moğab zimenden eliği yangelci.
Ular ahrı yığqan vax başlanqanda Betleheme gelci.