Rut Bovazniği astında
2
Nağominiği güyüsı Elimelexniği ağinisı arasında halı artqan bar kişor volcı,
u kişçüxniği adı Bovazdır.
2 Bur gün Moğab qadınkiş Rut Nağomiğe “Men astlıra varğıda,
kemniği ilinde ninden datsa,
aniği ardında baş deriği” edici.
Nağomi aña “Ya var,
qızım” edici.
3 Rut varı astora gilı,
oraxcılarniği ardında baş derici.
Eli volsa,
u cıñ Elimelexniği ağinisı Bovazniği astında derimiş.
4 U vaxda Bovaz Betlehemden gilı oraxcılıra “RAB selerla burlığı volğı” edici.
Ular aña “RAB saña yaxşı viği” edici.
5 Bovaz oraxcılarnı gollağucığa “Bu kiçi yaş qadınkişçüx kem'a ri?”
ede sorcı.
6 Oraxcılarnı gollağucı aña “U dese Moğab zimenden Nağomila burlığı gelğen Moğab qadınkişçüxa.
7 U maña ‘Men baş bur deriği,
oraxcılıra ireşgide bağlarniği arasında qalğanını bur deriği’ edir.
İnci u böxde gelğenden çoxurğına yetgunçüx,
öyde azırax diñgenden daşı munda derici” ede cavap verci.
8 Bovaz Rutğa “Ey qızım,
sen iştidu mu?
Başqı asta baş dereme varqıma,
mundan hem garlanqıma.
Sen munda miniği yoğmularımla burlığı qalduğu.
9 Oraxcılar orğan asta öşürdığıda,
yoğmularımniği ardına ireş.
Men saña değqıma ede işcilarıma emir etci.
Sen suvuğan vaxda,
su zitañlarniği yanına varda,
ular vurğan sudan iş” edici.
10 Rut yüzünı yere yaxı yükanı aña “Men daşı millet kişor volı,
siniği iliñde neğe ninden datı,
sen minı sugu etba ri?”
edici.
11 Bovaz aña “Güyüñ kuxun volğandan ardı sen qaynıña etgen heme işnı men añnacı.
Sen abıñnı,
amıñnı,
doğqan zimanıñnı çöyü,
maysuxdan danımığan xalqorniği arasına gimiş.
12 Sen etgen işniği sovabını RAB saña bur viği!
Sen RABniği qanatlarıniği cüyüne pilınma gilı,
İsra'ilniği Xudası RAB saña sovabıñnı ariçüx bur viği!”
ede cavap verci.
13 Rut “Miniği iyim,
men siniği iliñde ninden bur datqı.
Men siniği yoğmuñor volmısa da,
sen maña teselli virı,
bu carıxcıña küç etgen gahcını yenşacı” edici.
14 Lemi vaxda Bovaz Rutğa “Muña gel,
emexden çutda goburaxqa manda yi” edici.
Rut oraxcılarniği yanında oturcı,
Bovaz aña qormaş alberci.
Rut yiyi xosağı döyü,
dağı bici qalcı.
15 Rut baş dereme xotqanda,
Bovaz işcilarına “Bağlarniği arasında u baş deriği,
anı uyandırma;
16 dağı da bağlardan aña dereğine vulı bici soxurda çöydıver,
anı öhreme” ede emir etci.
17 Rut geşliğüne yetgunçüx astda baş derici;
dereğen ahrı başlarını diyı bur efaa kemasor gelci.
18 İnci u anı kötü şehere giqalı,
deregelğen başnı qaynasına görğesci.
Rut izı doxçüx işi,
qalğan leminı da çıxırgilı qaynasına verci.
19 Qaynası aña “Buğün sen qada baş derici?
Qada iş etci?
Saña iş köyğen kişe yaxşı endirği!”
edici.
Rut “Buğün men burlığı iş etgen kişçüxniği adı Bovaz ira” ede,
izı kemniği yanında iş etganını qaynasına yenşıberci.
20 Nağomi oğlan-kinına “Dirilere ma ülülere açışqusını unutmığan RAB aña yaxşı viği!”
edici.
Nağomi nene aña “Bu kişçüx ilerniği yaxın ağinidır,
u ilerniği cuushu etgusı qañ volğan ağinilerden burıdır” edici.
21 Moğab qadınkiş Rut “U da maña vaxı ‘Miniği heme ixanımnı yığı dosqunçüx sen işcilarımniği yanında baş dere’ edir” edici.
22 Nağomi oğlan-kinı Rutğa “Qızım,
yaxşa,
sen aniği yoğmularıla burlığı iş etme var,
edemese başqı astda sinı kemencılısa da choñ” edici.
23 Eli etgenniği ahrı ma boğdı yığı dosqunçüx Rut Bovazniği yoğmularıniği yanında baş derici.
U qaynasıla burlığı oturcı.