Yunus balux işinden dovu qılğanı
2
Yunus baluxçüxniği xosağı işinden izıniği Xudası RABğe beli dovu qılcı:
2 “Men azap işinde RABnı çıxracı,
U maña lan verci.
Ülüler dünyasıniği bağrından men zıqıracı,
Sen miniği ünümnı iştici.
3 Sen minı tiroñ su işine,
Deñizniği ortasına cağacı,
Ulı su minı tönen-qırğımdan gorlacı;
Siniği heme bisqanıñ ma çalğunıñ
Miniği iştımdan ötbarcı.
4 İnci men ‘Minı Siniği gözüñ ilinden qolacıçı,
Siniği muqaddes eybadet-sarıña men nene öşürğür’ edici.
5 “Sular minı iştımdan gömci,
Tiroñlux minı gorlacı,
Deñiz çöp başıma yörğenci.
6 Dağlar cüyüne yetgunçüx men siñci,
Zimen qosını ardımdan ebedi dıñnacı.
Ese ey RAB Xudam,
Sen canımnı tüçüxden çıxırgelci.
7 Canım menden çıxqur diğende,
RAB miniği gövnüme gelci.
Miniği dovum Siniği yanıña,
Siniği muqaddes eybadet-sarıña yetci.
8 “Kunşüniği uuşañlıra beylağucılar
İzler Xudaniği açışqanını cağabur.
9 Men ese shükür etgen ünümla
Saña qurban qılğur,
Men şat etganımnı ucına çıxırğur.
Dacuu RABden gibur!”
10 RAB baluxçüxe emir verci,
inci baluxçüx Yunusnı qurı yere quscı.