Yunus Peyğemberniği Kitabı
Yunusnı çıxrığanı ma aniği ireşmeğanı
1
RABniği gahcası Amitayniği oğlı Yunusa engilı beli edici:
2 “Nineva u ulı şeherdiği kişlerniği yemen itişi Miniği ilime yetci,
eli etgenniği sen terende aña varda,
anda oturğucılıra axqurlıda qiyrı.”
3 Ese Yunus RABniği ilinden Tarşışğa qaşqına vulı terenci.
U Yafoğa enbarı,
aña Tarşışğa varğan dadıx kimu bur uçıracı.
U RABniği ilinden qaşqına vulı kimucılarla burlığı Tarşışğa varğur ede,
yol tacasını virı kimuçüxe çıxcı.
4 Ese RAB deñiz iştında dadıx yel xotturcı,
deñizde dadıx boğnax yel xotı,
kimuçüx eli dozanqu kema volcı.
5 Kimucılar xorğı,
her kiş izıniği ilyahilarını çıxracı;
ular kimuçüx yumullanqına vulı işindiği yüxlernı deñiz işine cağacı.
Yunus ese ilyoxdan kimuçüxniği aşacüğü yürüne enbarı,
uzanmışda ağırlığına uxlamış.
6 Kimucıniği dambası Yunusniği yanına gilı “Sen niçixli uxlanır ri?
Xot,
siniği ilyahiñnı çıxrı.
Siniği ilyahiñ ilere sugu itı,
iler yoxqan volmısa da choñ” edici.
7 Kimucılar bur-burlarına “Gel,
iler can çöyalda bur vaxal,
bu belyo kemniği sebebinden ilere giba ri?”
edeşci.
Ular can çöyse,
can Yunusa değci.
8 İnci ular Yunusa vaxı “Piseme yenşıdıver,
bu belyoçüx kemniği sebebinden ipseme giba ri?
Sen nañ etgucıdır ri?
Sen qadan gelci?
Siniği gocañ qada var ri?
Sen qaysı xalqıdan gelci?”
ede sorcı.
9 Yunus “Men İbrani kişdır.
Deñiznı ma qurı yernı yarıtqan asmandağı Xuda RABden men xorğır” edici.
10 İnci kimucılar cıxıñ xorğı “Sen etgen bu iş nañdır ri?”
edici.
Yunus izı RABden qaşqanını ulıra yenşıberğenniği,
ular anı bilci.
11 Deñizdiği çalğunlar cünkünlene-cünkünlene volgelci,
eli etgenniği ular Yunusa “Saña ipser nañ etse,
deñiz basınbırar ri?”
ede sorcı.
12 Yunus ulıra “Seler minı damnıda deñiz işine cağı,
inci deñiz selere basınbırar.
Men bilir,
bu dadıx boğnax yel miniği sebebimden selere xotba” edici.
13 Eli volsa da kimucılar deñiz qırğına yanbarğur ede kimunı salcıçı,
ular yanbarınmacı,
neğe dese deñiz ulıra cünkünlene-cünkünlene volgelci.
14 İnci ular RABnı çıxrı “Ya RAB,
ipsem Saña bur yarılğı,
Sen bu kişçüxniği canıniği sebebinden ipsemnı bur yoxqan etqıma.
Sen,
ey RAB,
İzıñ galığan kemaçüx etgenniği,
yazux yoxqan kişniği ülümünı Sen ipsemniği başıma bur sanıbiqıma!”
edici.
15 İnci ular Yunusnı damnıqalı deñiz işine cağacı,
deñiz qaynışqanından basınbarcı.
16 U kişçüxler RABden cıxıñ xorğı,
RABğe qurban virı şat etci.
17 Yunusnı uxqına vulı RAB dadıx balux bur belen etci.
Yunus baluxçüxniği xosağı işinde üsh gün üsh geci qalcı.