Yunusniği ersı xotqanı ma Xudaniği iş köyğanı
4
Bu işçüx Yunusniği gövnüne cıxıñ enmi,
aniği ersı xotcı.
2 U RABğe dovu qılı “Ey RAB!
Men izımniği gocamda volğandox beli edemadu?
Sen ninden volğan,
rehimli,
ancor acıx gelmeğen ma cıxıñ açışqan Xudadır,
hem da iş köyü belyonı endirmes,
eli etgenniği men ilicüğü Tarşışğa qaşcı.
3 Ey RAB,
inci Sen miniği canımnı menden bur ahbarduğu,
men ülquse diri volğına vaxqan da yaxşı volğa” edici.
4 RAB aña “Sen ersıñ xotsa ornaşba ro?”
edici.
5 Yunus şeherçüxden çıxbarqalı,
şeherniği gün-çıxqan-sarında zoğzacı.
U anda izığa rupu bur örtü,
yelinküt işinde otarı,
şeherçüxde nañ iş çıxqur roñ ede öşürqalcı.
6 RAB Xuda göx mexıluqıa bur belen itı,
Yunusniği başına yelinküt örtberğine ma aña lyañzın volğına vulı,
göx mexıluqıçüxnı Yunusa vaxqan bixi çañnıtcı.
Yunus göx mexıluqıçüxe cıxıñ söyünci.
7 Ese ardı güne tañıtqanda Xuda qut bur belen etci.
Qutçüx u göx mexıluqıçüxnı qacı,
u qurcı.
8 Gün çıxqanda Xuda gün-çıxqan-sardan köydürğen yel xotturcı.
Gün Yunusniği başını cıxıñ xallı,
u zantüx vurcı.
İnci u ülümünı kele “Men ülquse diri volğına vaxqan da yaxşı volğa” edici.
9 Xuda Yunusa “Sen u göx mexıluqıçüxe vulı ersıñ xotsa ornaşba ro?”
edici.
Yunus “Ornaşba,
ersım xotı ülquse da ornaşba” edici.
10 RAB aña beli edici:
“Sen exmi,
çañnıtmi,
izı bur geciğe çıxı bur geciğe qurğan göx mexıluqığa yirix ağırba.
11 Ninevada izlerniği sıx ilını yolax ilından danınmığan kiş bur yüz yiğirmi miñden artux var,
dağı hayvan hem köp var,
Men ese bu ulı şeher Ninevağa yirix ağırmağu?”