Luka
Gilığan Yaxşı Xeber
Giriş
1
Hörmetli Tevofilos,
yarağor kişler ilerniği arasında çıxqan işlernı tarix piştixe giğirğür ede tıñnıncı.
2 Bu işlernı dese göze görğen şahitler ma Xudaniği sözüne fushı etgucılar ilicüğünden ilere yettirğen kema,
3 men hem her işnı başından aşgırı itı,
ili ardına ire saña piştese yaxşı volğa dibur;
4 eliği inci saña örğetgen işler cıñ volğanını sen bur bilği.
Yaxıyını doğqusını ilyoxdan yenşığanı
5 Yehudaya xoñshoñı Herodesniği vaxında,
Aviya diğen ruhani bölümden adını Zekeriya çıxrığan ruhani bur volcı.
Aniği kinı Harunoniği cudından çıxqucıdır,
adı Elizabet idır.
6 U işgisı da Xudaniği ilinde doğrı kişdır,
ular Rabniği heme emirlarını ma qaydalarını zullı,
ulıra ayıp yoxdır.
7 Ese Elizabet ganbı volğanniği,
ulıra balı çıxmacı;
u işgisı da ulı yaşında volcı.
8 Bur gün Zekeriya iz bölümüniği giziği volğanda,
Xudaniği ilinde ruhaniler etgusı fushını etci.
9 Ruhanilix adete ire,
Rabniği eybadet-sarısına girı tüssü deşirğine vulı can çöyse,
aña değci.
10 Tüssü deşirğen vaxda püştün zhemat daşında dovu qılqalcı.
11 Bu vaxda Rabniği melyayikesı burı tüssü deşirğen qurbanguniği sıx yanında tixanı,
Zekeriyağa görünci.
12 Zekeriya anı görğende cünkün yıllanı,
cıxıñ xorğacı.
13 Ese melyayikeçüx aña beli edici:
“Xorğıma,
Zekeriya!
Siniği dovuñnı iştici.
Siniği kinıñ Elizabet saña oğıl bur doğberer,
sen aniği adını Yaxıyı qoş.
14 Sen söyanı galar,
aniği doğqanından yarağor kişler hem söyüner.
15 Rabniği ilinde u ulı volar.
U puto sormu ma cın volğan sormu işmes;
u icasıniği xosağında volğandox Muqaddes Ruxula dolar.
16 U İsra'il oğlanlarından yarağor kişlernı izlerniği Xudası Rabğe yandırgeler.
17 Abılarniği yirixlarını balılarına çüreğine vulı,
gahcı diñnimiğücilernı doğrı kişlerniği aqıllarına çüreğine vulı ma,
Rabğe goblığan xalqını belen etgine vulı,
u İlasıniği ruxusıla ma qudritıla Rabniği ilinde yürer.”
18 Zekeriya melyayikeçüxe “Men munı niçixli olınar ri?
Men çoxur xarıcı,
miniği kinım hem ulı yaşında var” edici.
19 Melyayikeçüx aña “Men Xudaniği ilinde tixingen Cebrayildır.
Sila gahcı yenşışqına ma bu yaxşı xebernı saña bildirğine vulı minı dohulıyüreci.
20 Öşürdığı,
vaxına yetgu bu işler çıxar ede yenşığan bu gahcımnı sen yılımığanniği,
bu işler çıxqan güne yetgunçüxor sen yabı volı gahcı yenşınmas” ede cavap verci.
21 U vaxda xalqı Zekeriyağa güyübur,
aniği eybadet-sarıda yırğınqanı ulıra heyran volcı.
22 U daşına çıxgelğende ulıra gahcı yenşınmacı.
İnci ular Zekeriya eybadet-sarıda görüm görğanını bilci.
Zekeriya ulıra ilıla burğılı gahcı yenşınmacı.
23 Gizix etgen günları dolqalı,
Zekeriya izıniği öyüne varcı.
24 Andan ardı aniği kinı Elizabet xosağına kötci,
u beş ay öyünden çıxmacı.
25 U “Miniği uyatımnı kişlerniği arasından alğına vulı,
Rab maña ninden görğesgen iş bu idır” edici.
Aysonı doğqusını ilyoxdan yenşığanı
26 Elizabet boyağır volqalı altıncı ayda,
Xuda Cebrayil melyayikenı Celilediği Nasıra şehere,
27 Davudiniği zahsañından çıxqan,
adını Yusufu çıxrığan kişora kin engen anorniği yanına dohulıyüreci.
U anaçüxniği adı Meremdır.
28 Cebrayil melyayike aniği yanına gilı “Selyam,
ey ninden datqan anı!
Rab sila burlığı var” edici.
29 Merem bu gahcaçüxden cıxıñ xudulancı,
bu selyam nañ diğanıdır roñ ede sumurlacı.
30 Melyayikeçüx aña “Xorğıma,
Merem,
sen Xudadan ninden datcı.
31 Sen xosağıña kötü oğıl bur doğar,
sen aniği adını Ayso qoş.
32 U ulı volar,
anı da Bixicüğüniği Oğlı ede çıxrar,
Rab Xuda Aña ata-babası Davudiniği taxtını verer.
33 U dağı Yaqubiniği zahsañında ebedi höküm sürer,
Aniği Vañgosı ucı-qırğına çıxmas” edici.
34 Merem Melyayikeçüxe “Bu iş niçixli volunqa ri?
Men dağı anordır” edici.
35 Melyayikeçüx aña “Muqaddes Ruxu siniği iştıña ener,
Bixicüğüniği qudritı siniği iştıña yelinküt çiler.
Eli etgenniği doğulğanı hem muqaddesdır;
Anı Xudaniği Oğlı ede çıxrar.
36 Öşür,
siniği danaşıñ Elizabet hem izıniği xarı yaşında xosağına oğıl bur kötci.
Kişler anı doğunmığa ede,
çoxur u boyağır volı altı ay volbur.
37 Xudağa etinmiğanor yoxdır” ede cavap verci.
38 Merem “Men Rabniği bandesıdır,
maña siniği yenşığanıñ kema volğı” edici.
İnci melyayikeçüx aniği yanından garlanbarcı.
Merem Elizabetnı vaxma varğanı
39 U vaxda Merem teranı,
Yehudaya dağlıx zimendiği şeherora gillanı varcı.
40 U Zekeriyaniği öyüne girı,
Elizabete salim sorcı.
41 Elizabet Meremniği selyamını işteğende,
xosağındağı balası diginici.
İnci Elizabet Muqaddes Ruxula dolı,
42 dadıx ünüla zıqırı “Qadınkişlerniği arasında sen bextlidır,
siniği xosağıñ işindiği balıñ hem bextlidır!
43 Rabbimniği icası miniği yanıma gilı,
bu niçixli volmış şi?
44 Öşür,
siniği selyamıñ qulağıma yetgende ma,
xosağımdağı balım söyünçla diginir.
45 Rabniği yenşığan işler çıxqusını yılığan qadınkiş bextlidır” edici.
Meremniği hamd etgen yırı
46 Merem beli edici:
“Miniği canım Rabnı ulı etbur,
47 Miniği ruxum Dacuu etgucım Xudaniği pağıla söyünbur,
48 Neğe-de U izıniği bandesıniği aşax oturğanına sugu etci.
Öşür,
mundan ardı heme goñyındağı kişler minı bextli'a eder.
49 Küş-Volğucı maña ulı iş etci.
Aniği adı muqaddesdır.
50 Aniği rehimı Andan xorğağucılıra
Biybiyzığa yetgoñ volar.
51 U qolıla qudret volğan iş etci,
Yiriğinde zorlanqucılarnı dağıtcı.
52 U hökümcilernı taxtlarından endirgilı,
Aşax oturğucılarnı damnacı.
53 Açıxqucılarnı yaxşı nametla döydarı,
Bar kişlernı ese quriçüx yandıryüreci.
54-55 Rab İzıniği bandesı İsra'ile şañzhu etci,
İlerniği ata-babılıra yenşığan kema,
İbrahimiğe ma aniği xuurınına
Rehim görğesgusını ebedi gilacı.”
56 Merem Elizabetniği yanında üsh ay kemasor oturqalı,
izıniği öyüne yanbarcı.
Yaxıyı peyğembernı doğqanı
57 Elizabetniği ayınqusı vaxı yetqalı,
u oğıl bur doğcı.
58 Aniği hamzayıları ma danışları Rab İzıniği rehimını aña cıxıñ görğesganını añnı,
ala burlığı söyünci.
59 Sakisinci güne ular balaçüxe sünnet alma gelci,
ular aña Zekeriya ede abasıniği adını qoşbiğür edici.
60 Ese icası “Ahıñ,
aniği adını Yaxıyı çıxrağur” edici.
61 Ular aña “Danışlarıñniği arasında bu adnı qoşqucı yoxdır” edici.
62 Ular balaçüxniği abasına ilıla burğılıqalı,
u nañ ad qoşbiqusı giba ede sorcı.
63 U piştiğüsı tıxdı bur kele “Aniği adı Yaxıyıdır” ede piştici.
Bu heme kişlere heyran volcı.
64 U vaxda Zekeriyaniği ağzı dego açılcı,
dili çözülci.
İnci u gahcı yenşı,
Xudağa halqış etci.
65 Hamzayıları yogo xorğacı.
Yehudayaniği püştün dağlıx zimende bu heme işçüxlernı yenşışcı.
66 Rabniği qudritı ala burlığı volğanniği,
bu işçüxlernı añnağucor izlerniği yiriğinde “Bu balaçüx nisgor giğür roñ?”
edeşci.
Zekeriyaniği yüyen etganı
67 Balaçüxniği abası Zekeriya Muqaddes Ruxula dolı,
beli yüyen etci:
68 “İsra'ilniği Xudası Rabğe halqış volğı!
U İzıniği xalqısına rehmet görğası,
ularnı cuushu etci.
69 U İzıniği bandesı Davudiniği zahsañından
İlere küş volğan Dacuu-etgucı bur xotturgelci.
70 Qedimden İzıniği muqaddes peyğemberlarıniği ağzından yenşığan kema,
71 İlerniği düşmenlerden ma ilernı heme yöhgirğüciniği ilından U ilernı cuulabur.
72 U ilerniği ata-babılıra rehim görğası,
İzıniği muqaddes ahitını gövnünden çıxırmacı.
73 U ilerniği ata-babı İbrahimiğe şat itı,
74-75 İler ömür-poñor xorğamiçüx Rabniği ilinde
Muqaddeslix ma doğrılıxla Aña eybadet etgi ede,
U düşmenlerniği ilından ilernı dacuu etci.
76 “Ey balım,
sinı Bixicüğüniği peyğembarı ede çıxrar,
Sen Rabniği yolını belen etgine vulı,
Aniği ilinde yürer.
77 Aniği xalqısıniği gunıhalarını afu etganından
Ulıra dacuu volğusını sen bildirer.
78-79 İlerniği Xudaniği rehim görğesgen pağıla,
Qarıñqulux ma ülüm yelinkütde oturğucılıra yarux engine vulı ma
İlerniği ayaxlarnı salim yola başlığına vulı,
Orxadan çıxgelğen güneş ilere ener.”
80 Bu balaçüx çañnıgilı,
ruxusına küş girci.
U İsra'il xalqığa görüngunçüxor gañtañda oturcı.