Aysonı çüse etganı
4
Ayso Muqaddes Ruxula dolı,
Yordan mörenden yancı.
Muqaddes Ruxu anı gañtaña başlıbarcı.
2 Anda iblis Aysonı qirıx gün çüse etci.
Ayso u günlerde heşbeşor yimacı,
qirıx gün dolqalı U açıxcı.
3 İblis Aña “Sen Xudaniği Oğlı volsa,
bu daşa emexe bellengusını emir et ya” edici.
4 Ayso aña “ ‘İnsan emexlaçüx otaruxdır’ ede piştibur” ede cavap verci.
5 İnci iblis Aysonı bixi yürüne çıxırbarı,
dünyadağı heme vañgolarnı Aña bur zaman arasına görğesci.
6 İblis Aysoğa “Men ularniği heme qañını ma şerifusını Saña viği.
Ularnı maña verci,
men ularnı keme viqusı gelse vibur.
7 Eli etgenniği Sen maña secide etse,
bu yogosı siniği volar” edici.
8 Ayso aña “ ‘Xudañ Rabğe secide et,
Añaçüx eybadet et’ ede piştibur” ede cavap verci.
9 Ardi iblis Aysonı Yerusalime başlıbarı,
eybadet-sarıniği bixicüğü yüründe tixindarı Aña “Sen Xudaniği Oğlı volsa,
İzıñ mundan cüyüne cömne;
10 neğe dese Kitapda
‘Sinı iyitgine vulı,
Xuda Sinı sumurlı melyayikelarına emir verer,
11 Ayağıñ daşa vurquğa ede,
ular elları iştına Sinı zeler’ ede piştibur” edici.
12 Ayso aña “ ‘Xudañ Rabnı shıdañlıma’ ede piştibur” ede cavap verci.
13 İblis heme çüsenı itı volqalı,
Aysoniği yanından aardı garlanbarcı.
Ayso Celilede
14 Ayso Muqaddes Ruxuniği küşüla Celileğe yangelci.
Aniği xebarı u tönen-qırğındağı püştün zimene yazılcı.
15 U andağı eybadet-öylerde örğetci,
her kiş Anı kolacı.
16 Ayso İz çañnığan zimen Nasırağa gelci,
İzıniği adetine ire Şabat güne eybadet-öye girci.
U Muqaddes Piştixlerden oxığına vulı tixinci.
17 Aña Yeşaya peyğemberniği kitabını verci.
İnci U kitapnı aşı beliği pişteğen yürünı datcı:
18-19 “Rabniği Ruxusı Miniği iştımda var,
Yox kişlere Yaxşı Xebernı bildirğine vulı,
U Minı dañnı yağla dellici.
Çutulğucılıra azatnı ma
Qorılıra gözü görğüsını qiyrığına vulı,
Yapo cüyünde volğucılıra azat verğine ma
Rabniği ninden yılını qiyrığına vulı,
U Minı dohulıyüreci.”
20 İnci Ayso kitapnı dürqalı,
iyitgucığa virı zoğzacı.
Eybadet-öydiği heme kişler Aña qadanı öşürci.
21 Ayso ulıra “Bu Muqaddes Piştixde pişteğanı buğün seler iliñde çıxcı” ede yenşıma başlacı.
22 Heme kişler Aysonı yaxşı yenşacı,
Aniği ağzından çıxgelğen niñ volğan sözler ulıra heyran volcı.
İnci ular “Bu Yusufuniği oğlı emesdır mi?”
ede yenşışcı.
23 Ayso ulıra beli edici:
“Seler shıxoçüx ‘Ey ağrıx vaxqucı,
Sen izıñnı bur voldurduğu!’
diğen yenşışnı Maña yenşı ‘Sinı Kapernahumda etmiş ede ipser añnığan işlernı Sen munda iñniği zimanıñda hem bur et ya’ eder.”
24 U nene beli edici:
“Men shıxoçüx selere yenşağı,
iz çıxqan zimanında qaysı volsa peyğembernı zelemes.
25 Men selere cıñını yenşağı,
İlasıniği goñyınında üsh yıl altı ay asmannı tıxı yağmi,
püştün zimende ağır açlıx volğanda,
İsra'ilde goho yarağor volcı.
26 Ese Sidondağı Sarefat şeherdiği gohorniği yanınaçüx demese,
İlasını ulardan bur kişniği yanına da dohulıyüremacı.
27 Elişa peyğemberniği goñyınında İsra'ilde mafınbin değgucı yarağor volcı.
Ese Suriyadağı Nağamançüx demese bur kiş da arılmacı.”
28 Eybadet-öydiği yogosılar bu gahcılarnı işteğende ma,
qeherlanı padağu kema volcı.
29 Ular xotqalı Aysonı şeherçüxden qolacı,
Anı aşaxqa şityüreğür ede,
şehernı qurğan dağ qırğına başlıbarcı.
30 Ese Ayso ularniği arasından ötbarı andan garlanbarcı.
Ayso arı emesgen ruxu'ornı qolığanı
31 Ayso Celilediği Kapernahum şehere enbarcı.
Şabat güne U xalqığa örğetci.
32 Aniği gahcasına qañ volğanniği,
aniği örğetganı ulıra heyran volcı.
33 Eybadet-öyde arı emesgen cinden ağırğan kişor volcı.
U acı ünüla
34 “Ecücü,
ey Nasıra kiş Ayso,
ipsemla Sen nañ etgur ri?
Sen ipsemnı yoxqan etme geldu?
Sen kem volğanıñnı men bilir,
Sen Xudaniği Muqaddisıdır!”
ede zıqıracı.
35 Ayso “Çolıma,
bu kişçüxden çıxdıvar” ede anı xalacı.
İnci şu cinçüx u kişçüxnı yogosıniği ilinde yere gülündarı andan çıxcı,
u kişçüxe heşbeşor şañnımacı.
36 Heme kişlere heyran volı,
ular bur-burına “Bu nisgi gahca ri?
Arı emesgen ruxulıra U qañçen ma küşla emir itı,
ular çıxqan!”
edeşci.
37 Aysonı yenşışqan xeber u tönen-qırğındağı heme zimene yazılcı.
Ayso yarağor ağrıxcını voldurğanı
38 Ayso eybadet-öyden çıxgiqalı,
Simunniği öyüne girci.
Simunniği qaynı-aması u vaxda cıxıñ qızıba,
ular anı voldurğına vulı Aysoğa yarılcı.
39 Ayso aniği yanında tixanı qızığanını xalacı,
aniği qızığanı andan yancı.
İnci u qadınkişçüx dego xotqalı,
ularnı qonax camnacı.
40 Gün batbığanda dürlüx dürlüx ağrıx değgen heme kişlernı Aysoniği yanına ahgelci.
Ayso ellarını her kişe bur-bura qoybirı,
ularnı voldurcı.
41 Yarağor kişlerden cinler “Sen Xudaniği Oğlıdır” ede zıqırı çıxgelci.
Ular Ayso dese Mesih eğanını bilğenniği,
Ayso ularnı xalı yenşağusı ruxset vermacı.
42 Asman tañıtqalı Ayso daşına çıxbarı,
kiş oturmığan yürora varcı.
Kişxoban Anı işdeqalı aniği yanına gelci.
İnci ular Anı izlerden garlanqıma ede tuscı.
43 Ese Ayso ulıra “Xudaniği Vañgosıniği Yaxşı Xebarını Men başqı şeherlere hem yazqu keler,
bu meqsuta vulı Minı dohulıyüreci” edici.
44 İnci Ayso Yehudayadağıa eybadet-öylerde vası etci.