Aysoniği ilicüğündiği muritları
5
Bur gün Ayso Ginesar gölniği yanında tixingende,
kişxoban Xudaniği sözünı diñnengine vulı Aysonı gorlıgilı qısdışcı.
2 Ayso göl qırğında durğan kimu işgi görci.
Baluxcılar ese kimularından enmişde dorlarını yuba.
3 Ayso kimuçüx işgisından burına — Simunniği kimusına çıxı,
Simuna yenşı u kimuçüxnı göl işine güdür ahbardırcı;
inci İzı zoğzıqalı kimuçüx iştından kişxobana örğetci.
4 U gahcasını yenşı volqalı Simuna “Kimuñnı tiroñ su yürüne ahbarda,
balux çutqına vulı dorlarıñnı suğa vur” edici.
5 Simun “Eş Usdat,
piser tañor vursa da,
heşbeşor çutunmacı.
Ese Siniği gahcıña iriğide,
men dorlarnı nene vurğı” ede cavap verci.
6 Ular eliği etqalı balux eli yarağor çutı,
dorları cadalbarcı.
7 İnci ular ellarını yıxılı,
bursı kimudağı cablarını bañnışma çıxracı.
Ular gilı kimuçüx işgisına da balux doldurqalı,
kimuçüxler siñgu kema volcı.
8 Simun Petrus munı görğende,
Aysoniği ayaxları ilinde yükanı “Ey Rab,
men gunıhali kişor volğanniği,
Sen menden bur garlanduğu” edici.
9 Balux çutqanı artux volı,
u izığa ma yanında volğucora cünkün heyran volcı.
10 Simunniği cabları Zebedayniği oğılları Yaqubiğe ma Yaxıyığa hem heyran volcı.
Ayso Simuna “Xorğıma,
mundan ardı balux ornına sen kiş çutar” edici.
11 İnci ular kimularını göl qırğına çıxarı,
nañkirixnı cağı Aysoniği ardına ireşci.
Ayso mafınbin değgen kişornı voldurğanı
12 Bur gez Ayso şeherlerden burında volğanda,
anda püştün poñına mafınbin değgen kişor volcı.
U Aysonı görğende ma,
yüzünı yere yaxı yükanı Aña “Ey Rab,
Sen arıtqusı gelse,
minı bu ağrıxdan arıtınar” ede yarılcı.
13 Ayso ilını uzatı,
aña değqalı “Men arıtqusı gilır,
arın” edici.
İnci mafınbin ağrıx dego u kişçüxden garlancı.
14 Ayso aña “Munı bur kişe da yenşıberme,
ese sen varda izıñnı ruhaniğe görğes;
dağı da kişlere delil volğı ede,
mafınbinden arınqanıña vulı Mosoniği emir etganına i#05825fe niyit çıxır” ede emir verci.
15 Ese Aysonı yenşışqan xeber yohodiğine yazıncı.
Limañ kişxobanlar Aysoniği yenşığanını diñnengine vulı ma izlerniği ağrıxlarını voldurğına vulı,
Aniği yanına yığıngelci.
16 Ayso ese kiş oturmığan yüre yanbarı dovu qılba.
Ayso loxdılanqan kişornı voldurğanı
17 Bur günor Ayso örğetbur,
Celilediği ma Yehudayadağı heme ağıllardan ma Yerusalimden gelğen Fariseyler ma Qanun mutalimler hem anda zoğzabur.
Ağrıxcılarnı voldurğına vulı,
Rabniği küşü Aysola burlığı volcı.
18 U vaxda kiş bici loxdılanqan kişornı çiyix iştına damnıgelci.
Ular anı öy işine giğirbarı,
Aysoniği iline qoyğur ede tıñnıncı.
19 Ese anda kiş tıxınışqanniği,
ular anı öy işine niçixli giğirbarğusını bilmacı.
İnci ular ehçix iştına çıxbarı valarnı söxü,
arasından u kişçüxnı çiyix iştından kişlerniği ortasına,
Aysoniği iline endiryüreci.
20 Ayso ularniği imanını görü “Dosdan,
siniği gunıhalarıñnı afu etci” edici.
21 Qanun-tişlengucılar ma Fariseyler yirixlarında “Küfür etgen bu kişçüx kem'a ri?
Xudadan başqı kem gunıhalarnı afu etiner ri?”
ede sumurlacı.
22 Ayso ularniği sumurlaşını bilqalı,
ulıra beli edici:
“Seler yirixlarıñda neğe eli sumurlabur ri?
23 Qaysı mundaña ri?
‘Siniği gunıhalarıñnı afu etci’ edese mundaña mu ‘Xotda yür!’
edese mundaña ri?
24 Ese Adam Oğlına zimende gunıhalarnı afu etgusı qañçen volğanını seler bur bilği.”
İnci Ayso loxdılanqan kişçüxe “Saña Men yenşağı,
xot,
çiyiğiñnı çutda öyüñe var” edici.
25 U kişçüx dego ularniği ilinde xotqalı izı yatqan çiyiğinı çutı,
Xudağa şerifu ete-ete izıniği öyüne varcı.
26 Her kişe cünkün heyran volı Xudağa şerifu etci,
ular xorğı “Buğün iler alyamet iş görci” edici.
Ayso Levinı murite dañnığanı
27 Bu işlerden ardı Ayso daşına çıxbarcı,
U shuy yığqan yüründe zoğzığan,
adını Levi çıxrığan shuy yığqucor görci.
U aña:
“Miniği ardıma ireş” edici.
28 U kişçüx nañkirixnı cağı xotqalı,
Aysoniği ardına ireşbarcı.
29 Levi iz öyünde Aysoğa vulı ulı şı tıñnacı.
Anda yarağor shuy yığqucı ma başqı kiş ularla şırı qırğında burlığı oturcı.
30 Fariseyler ma ularniği qanun-tişlengucıları Aysoniği muritlarına honañlı “Seler neğe shuy yığqucılar ma gunıhacılarla burlığı işi yibur ri?”
edici.
31 Ayso ulıra “Sıx kişe ağrıx vaxqucı kelemes,
ağrıxcığa keler.
32 Men doğrı kişlernı çıxrıma gelmacı,
ese gunıhacılarnı töbeğe çıxrıma gelci” ede cavap verci.
Rozı çutqusını sorğanı
33 Ular Aysoğa “Yaxıyıniği muritları yaçala rozı çutı dovu qılba,
Fariseylerniği muritları hem eliği etba;
Siniğiler ese işba yiba” edici.
34 Ayso ulıra “Gufubo doyığa gelğen qonaxlarniği yanında volğanda,
seler qonaxlarnı rozı çuttursa yarar ro?
35 Ese gufubonı ularniği arasından ahbarğusı günler geler,
inci u vaxda ular rozı çutar” edici.
36 Ayso ulıra bifañ hem bur qoyberci:
“Yañı biqırıxdan bur tige böz yirtı,
esgi biqırıxqa yamax vurğucı yoxdır;
eli etse yañı biqırıx hem yirtiler,
yañı biqırıxdan yirtgen böz tige hem esgi biqırıxqa yarışmas.
37 Yañı puto sormunı esgi tuluxlıra coñnağucı hem yoxdır;
eli etse yañı puto sormu esgi tuluxnı padıtar,
puto sormu hem döxüler,
tuluxlar hem şellener.
38 Yañı puto sormunı yañı tuluxlıra coñnağu keler.
39 Esgi puto sormunı işqalı yañısını keliğüci yoxdır,
u da ‘Esgisı yaxşa’ eder.”