Şabat günniği işinı añnışqanı
6
Bur Şabat güne Ayso ixin astlarniği arasından ötbarbur.
Aniği muritları baş tadı,
oclarında oyu yici.
2 Fariseylerden burisı “Seler neğe Şabat güne etse yarımığan işnı etbur ri?”
edici.
3 Ayso ulıra “Davudi ma aniği yanındağılar açıxqanda nañ etganını seler oxımadu?
4 U Xudaniği öyüne girbarı,
ruhanilerden başqı kem volsa da yiğen yarımığan Xudağa çıxırğan emexlernı ahgilı yici,
u yanındağılıra hem verci” ede cavap verci.
5 Ayso dağı ulıra “Adam Oğlı Şabat günniği İyisıdır” edici.
İlı qurğan kişornı voldurğanı
6 Nene bur Şabat güne Ayso eybadet-öye girı örğetci,
anda sıx ilı qurğan kişor volcı.
7 Qanun-tişlengucılar ma Fariseyler Aysonı çöxgusı kaxor datqına vulı,
Şabat güne U ağrıx vaxar mu ede gözlici.
8 Ayso ularniği sumurlaşını bilı,
ilı qurğan kişçüxe “Xotda ortasında tixin!”
edici.
U kişçüx xotqalı anda tixinci.
9 İnci Ayso ulıra “Selere Men bur sorğı,
Şabat güne yaxşılıx etse yarıba mu yemenlix etse?
Can cuulısa yarıba mu yoxqan etse?”
ede sorcı.
10 Ayso tönen-qırğındağı kişlere öşürqalı,
u kişçüxe vaxı “İlıñnı uzat!”
edici.
U kişçüx ilını uzatcı,
inci aniği ilı sıxçüx volcı.
11 Qanun-tişlengucılar ma Fariseyler ese cıxıñ qazaplanı,
Aysoğa nañ etgusını bur-burıla soruşcı.
On işgi resulnı dañnığanı
12 U günlerde Ayso dovu qılğına vulı dağqa çıxbarcı,
U tañor Xudağa dovu qılcı.
13 Güntüs volqalı U muritlarını iz yanına çıxrı,
ularniği arasından bu on işgi kişnı dañnı,
ularnı resul ede çıxracı:
14 Simun (Ayso anı Petrus ede hem çıxracı) ma aniği inisı Andere,
dağı Yaqubi,
Yaxıyı,
Filipus,
Bartolomay,
15 Matta,
Tomas,
Alfayniği oğlı Yaqubi,
milletci ede çıxrığan Simun,
16 Yaqubiniği oğlı Yehuda ma ardi Aysonı chumay etgen Yuda İskariyot.
Ayso ağrıxcılarnı voldurğanı
17 Ayso ularla burlığı aşaxqa engilı,
piñ yüründe tixinci.
Anda Aniği muritları limañ xobanor volcı,
dağı püştün Yehudayadan,
Yerusalimden,
Sur ma Sidonniği deñiz qırğındağı zimenlerden gelğen kiş moxlañ artux volcı.
18 Ular Aysoniği gahcasını diñnengine ma izlerniği ağrıxlarını voldurğına vulı gimiş.
Arı emesgen ruxu çutqucılarnı hem voldurcı.
19 Aysodan çıxgelğen küş ular yogosını voldurğanniği,
püştün kişxoban Aysoğa değgur ede tıñnıncı.
Aysoniği vasısı
20 Ayso İzıniği muritlarına öşarı beli edici:
“Bextlidır seler,
ey yox kişler!
Xudaniği Vañgosı selerniğidır.
21 Bextlidır seler,
ey çoxur açıxqucılar!
Seler döyer.
Bextlidır seler,
ey çoxur yağlağucılar!
Seler küler.
22 “Adam Oğlıniği sebebinden kişler selernı yöhgirğende,
selernı kişe qarışdırmığanda,
selernı vuru etgende,
adlarıñnı yemenlix kema cağığanda,
seler bextlidır!
23 Seler u vaxda galıda söyünçla digine!
Öşür,
selerniği sovabıñ cennetde ulıdır;
ularniği ata-babıları hem peyğemberlere eliği etci.
24 “Ese selere belyodır,
ey bar kişler!
Seler teselliñnı çoxçuçüx alcı.
25 Selere belyodır,
ey çoxur dox volğucılar!
Seler açıxar!
Selere belyodır,
ey çoxur külüğüciler!
Seler yas itı yağlar.
26 Heme kişler selerniği yaxşıñnı yenşığanda,
selere belyodır!
Ularniği ata-babıları hem yalğan peyğemberlere eliği etci.
Düşmenlarıña açış
27 “Ese Miniği gahcımnı diñniğüciler,
selere Men yenşağı:
izıñlarniği düşmenlarıña açış,
selernı yöhgirğücilere yaxşılıx et.
28 İzıñlarnı qarğağucılıra yaxşı-niyit qıldıver,
izıñlarnı zulağucılıra dovu qıldıver.
29 Camduğuñ burını chulağucığa bursı camduğuñnı hem çü#05825fıver.
Donıñnı ahbarğucı işine giyğüsı xantarıñnı ahbarsa hem tusma.
30 Senden keliğücora ver,
siniği vocanlarıñnı ahbarğucıdan ularnı kelegiqıma.
31 Seler kişlernı iñsılıra niçixli et dese,
seler hem ulıra eliği et.
32 “Seler izıñlıra açışqucılıraçüx açışsa,
şu selere nañ sovap var ri?
Gunıhacılar da izlere açışqucılıra açışba.
33 Seler izıñlıra yaxşılıx etgucılıraçüx yaxşılıx etse,
şu selere nañ sovap var ri?
Gunıhacılar da eli etba.
34 Seler kişlere uçılıbirı ulardan keligiğüsını ümit etse,
şu selere nañ sovap var ri?
Gunıhacılar da izler uçılıberğanına ire yığgelse ede,
başqı gunıhacılıra uçılıbiba.
35 Seler ese izıñlarniği düşmenlarıña açış,
ulıra yaxşılıx et,
heşbeşor yandırberğine ümit dartmıda uçılıdıver.
İnci selerniği sovabıñ ulı volar,
seler da Bixicüğüniği oğılları volar;
neğe dese Xuda zhıgan etmiğücilere ma yemen kişlere da yaxşıdır.
36 Selerniği asmandağı Abıñ rehimli volğan kema,
seler hem rehimli vol.
Başqı kişlernı höküm etme
37 “Başqı kişlernı höküm etme,
selernı hem höküm etmes.
Hukun çıxırma,
selere hem hukun çıxırmas.
Afu et,
selernı hem afu eter.
38 Seler verse,
selere hem verer;
bası dullıqalı gansançüx öşü,
selerniği qoynuña çoxçoxlığına verer.
Seler nisgi öşgusı saxıtla öşberse,
selere hem elisgi öşgusı saxıtla öşberer.”
39 Ayso ulıra bifañ hem bur qoyberci:
“Qorı qorını başlınar ro?
İşgisı da lorduña çüşbımığa mi?
40 Örğengucı örğetgucıdan iştı emesdır,
ese yaxçuçüx örğen volqalı,
her örğengucı izığa örğetgucı kema volar.
41 Sen neğe ağiniñniği gözündiği xılçıxnı görü,
iñniği gözüñdiği dağunı golla'uxdır ri?
42 İñniği gözüñdiği dağunı görmi,
ağiniñe niçix ‘Ağinim,
men gözüñdiği xılçıxnı albiği’ edener ri?
Ey yüzlüxcin,
sen aardı iñniği gözüñdiği dağunı al,
inci sen aşgıraçüx görü,
ağiniñniği gözündiği xılçıxnı alberse volar.
Dal ma yimişi
43 “Yaxşı dal yemen yimiş durmas,
yemen dal hem yaxşı yimiş durmas.
44 Her dalnı izıniği yimişinden danar.
Tigenden vuxago yığınmas,
tigen shomudan hem puto tadınmas.
45 Yaxşı kiş yiriğindiği yaxşılağından yaxşılıx çıxırar,
yemen kiş yiriğindiği yemenliğinden yemenlix çıxırar.
Yiriğindiği dolğanından ağzı yenşı çıxırar.
46 “Seler neğe Minı ‘Rab,
Rab’ ede çıxrı,
Miniği yenşığanımnı ituxdır ri?
47 Miniği yanıma gilı,
sözlarımnı diñne ularnı etgen kiş keme oxşığanını Men selere görğesbiğür:
48 u tiroñlığına qazı,
dicisını qayı iştında qurqalı öy örtgen kiş kemadır.
U öyçüxnı gansançüx örtgenniği,
sel su gilı mören su öyçüxnı vursa da,
anı teretinmes.
49 Ese gahcımnı işteqalı ularnı etmeğen kiş dese dici yoxmiçüx,
yerde öy örtgen kiş kemadır.
Mören su öyçüxnı vurı u dego yıxılar,
öyçüxniği yıxılaşı hem cünkün volar.”