Ayso yetmiş işgi kişnı dohulıyüreğanı
10
Bu işlerden ardı Rab başqı yetmiş işgi kişnıa dañnı,
ularnı İzı varğusı her şehere ma her yürüne İzıdan iline işgi işgi dohulıyüreci.
2 U ulıra beli edici:
“İxin yığqusı artuxa,
ese işci aza;
eli etgenniği ixanını yığqına işcilernı dohulıyüreği ede,
seler ixinniği İyisına yarıl.
3 Seler var!
Men selernı börılarniği arasına quzılar kema dohulıyürebur.
4 Seler helli kuğü hem,
xab hem,
xay hem da ahbarqıma.
Yolda kem volsıla gahcı soruşqıma.
5 Seler qaysı öye girse,
aardı ‘Bu öye salim bur engi’ ede.
6 Anda xepin kiş volsa,
seler verğen selyamıñ aniği iştına ener;
anda yoxmısa,
seler verğen selyamıñ iñsılıra yangeler.
7 Girğen öyçüxde qal,
işciğe izıniği gunzısı babılığanniği,
selere nañ verse anı yide iş.
Öyden öye cılınma.
8 Seler qaysı şehere girı ular selernı zelese,
iliñe qoyberğanını yi.
9 Andağı ağrıxcılarnı voldurda,
ulıra ‘Xudaniği Vañgosı selere yaxılacı’ ede.
10 Seler qaysı şehere girı ular selernı zelemese,
andağı gedolıra çıxdıvarda
11 ‘Selerniği şehirıñdan pisemniği ayaxlarıma sürengelğen samdunı da ipser selerniği iliñde silğibur.
Ese munı seler bilduğu:
Xudaniği Vañgosı yaxılacı’ ede.
12 Men selere yenşağı:
qiyamet güne şu şeherçüxniği cezasına vaxqan da Sodomaniği yumul volar.
13 “Saña belyodır,
ey Xorazin!
Saña belyodır,
ey Betsayda!
Selerniği arasıñda görğesgen kerametlernı Sur ma Sidonda görğesgende volsa,
ular oholdan yırı gemder böz giyi,
küli iştında zoğzı töbe etgu volcı.
14 Qiyamet güne selerniği cezaña vaxqan da Sur ma Sidonniği yumul volar.
15 Dağı da sen,
eş Kapernahum,
sinı asmana yetgoñ damnığa ru?
Ahıñ,
sinı ülüler dünyasına endirer.
16 “Selerniği yenşığanıñnı diñniğüci Miniği yenşığanımnı diñnibur,
selernı cağağucı Minı cağabur;
Minı cağağucı Minı Dohulıyüreğücinı cağabur.”
17 Yetmiş işgisılar söyünçla yangilı “Ey Rab,
Siniği adıñniği pağıla cinler hem ipsemnı diñnir ra!”
edici.
18 Ayso ulıra beli edici:
“Sheytan asmandan yıldırcañ kema çüşgiğanını Men görci.
19 Öşür,
Men selere yılınlarnı,
cacılarnı ma düşmenniği heme küşünı ayax cüyüne basqına qañçen verci;
selere nañkirix şañnınmas.
20 Eli volsa da seler ruxularniği iñsılıra shunfu etganına söyünmede,
adlarıñnı asmanda gilığanına söyün.”
21 U vaxda Ayso Muqaddes Ruxudan cıxıñ söyanı beli edici:
“Ey Aba,
asman ma zimenniği İyisı!
Sen bu işlernı aqıl ma erlin volğan kişlerden yaşarı masımlıra görğesgenniği,
Men Saña shükür etbur.
İdır,
Aba!
Sen eliği etgine galabur.
22 Abım heme işnı Maña colıberci.
Oğıl kem volğanını Abıdan daşı bur kiş da bilmes;
Abı kem volğanını Oğıl ma Oğıl görğesqusı gelğen kişlerden daşı bur kiş da bilmes.”
23 Ayso muritlarına çürengilı ulıraçüx beli edici:
“Seler görğanıñnı görğen gözler bextlidır!
24 Men selere yenşağı:
yarağor peyğemberler ma xoñshoñlar seler görğanıñnı görqusı gelciçi,
ular görmacı.
Seler işteğanıñnı iştiqusı gelciçi,
ular iştemacı.”
Yaxşı Samariya kiş
25 Bur qanuncor xotqalı Aysonı shıdañlı “Mutalim,
men nañ etse,
maña ebedi can değga ri?”
edici.
26 Ayso aña “Qanunda nañ pişteba ri?
Sen anı niçixli oxabur ri?”
ede sorcı.
27 U kişçüx “Xudañ Rabğe püştün yiriğiñla,
püştün canıñla,
püştün küşüñla ma püştün sumurlaşıñla açış.
Hamzayıña hem izıña açışqan kema açış” ede cavap verci.
28 Ayso aña “Sen doğrı cavap verci;
munı etça saña can değer” edici.
29 Ese u kişçüx izı idır ede görğesgine vulı,
Aysoğa “Miniği hamzayım kem'a ri?”
ede sorcı.
30 Ayso aña beli cavap verci:
“Bur kişor Yerusalimden Yerikoğa enbığanda,
u çixcinlerniği ocına çüşmiş.
Çixcinler aniği biqırağını sürbarı,
anı diyı yarımcanını çıxarı cağıbarmış.
31 Cañ u vaxda ruhani bur şu yoldan engelmiş;
ruhaniçüx u kişçüxnı görü,
yolniği ele samından ötbarmış.
32 Levi kişor hem aña gilı u kişçüxnı görü,
yolniği ele samından ötbarmış.
33 Qo çıxqan Samariya kişor aña gilı,
u kişçüxnı görğende aña iş köymiş.
34 U aniği yanına varı,
yağ ma puto sormunı aniği nad etgen yürüne xodarı bağlıbimiş.
İnci anı iz kardasıniği iştına mindarı,
qonax-öye ahgilı anı sosın etmiş.
35 Ardı güne u da helli işgi dinar çıxırgilı,
qonax-öyçüxnı iyitgucığa virı ‘Bu kişçüxnı bur sosın etdığı.
Sen mundan da artux carısa,
men yangelğende saña viği’ edimiş.”
36 İnci Ayso “Sen vaxsa bu kiş üçüsından qaysı burı u çixcinlerniği ocına çüşgen kişçüxniği hamzayısa ra?”
ede sorcı.
37 Qanuncıçüx “Aña rehim görğesgen kişçüxa” edici.
Ayso aña “Varda sen hem eliği et” edici.
Ayso Marta ma Meremniği öyünde
38 Ayso İzıniği muritlarıla bili yolda yürğende ağılora girbarcı.
Anda Marta çıxrığan qadınkişor Anı öyüne camnacı.
39 Martağa Merem çıxrığan siñnı bur volcı;
u Rabniği ayaxlarıniği yanında otarı,
Aniği sözlarını diñnenci.
40 Marta ese belen etgusı yarağor volğanından yirix lollancı.
İnci u Aysoniği yanına gilı “Ey Rab!
Siñnım men izım bur kişnıçüx belen ettirse,
Sen gollımas su?
Sen aña yenşıda,
u maña bur bañnışqı ya” edici.
41 Rab aña “Marta,
Marta,
sen artux işlere qım yiyi uslıba.
42 Keliğüsı iş burçüx var.
Merem yaxşısını dañnacı,
anı Meremden ahbarınmas” ede cavap verci.