Ayso onişgilernı dohulıyüreğanı
9
Ayso on işgi muritnı yanına çıxrı,
ulıra heme cinlernı qolağusı ma ağrıxlarnı voldurğusı küş ma qañçen verci.
2 U da ularnı Xudaniği Vañgosını vası etgine ma ağrıxlarnı voldurğına vulı dohulıyüreci.
3 Ayso ulıra beli edici:
“Qo çıxqına vulı heşbeşor çutma:
hasa hem,
xab hem,
azux hem,
helli hem,
xantır işgi hem çutma.
4 Seler qaysı öye girse,
u öyde oturda andan yola çıx.
5 Ese kişler selernı zelemese,
şu şeherden çıxgelğende,
ulıra şehadet volğına vulı ayaxlarıñdağı samdunı silğe.”
6 İnci ular yola çıxı ağıldan ağıla ilanı,
qada volsa Yaxşı Xebernı yazcı,
ağrıxlarnı hem voldurcı.
Herodes xudulanqanı
7 Herodes xan bu çıxqan heme işlernı añnıqalı xudulancı,
neğe dese buri kişler Yaxıyını ülümden dirilmiş dici,
8 buri kişler İlası görünmiş dici,
başqasılar ese qedimdiği peyğemberlerden burı dirilmiş dici.
9 Ese Herodes “Yaxıyıniği başını men cadatcı,
ese men añnığan bu xeberçüx kemnı yenşıba ri?”
edici.
İnci u Anı görğür ede tıñnıncı.
Ayso beş miñ kişnı xosax döydürğanı
10 Resullar Aysoniği yanına yangilı,
izler etgen işlernı Aña yenşıberci.
Ayso ularnı başlı,
Betsayda diğen şeherora iz çosılarçüx varcı.
11 Ese kişxobanlar munı bilqalı Aniği ardına ireşbarcı.
Ayso ularnı zele ulıra Xudaniği Vañgosını yenşıberci,
ağrıxlarını vax keliğücilernı hem voldurcı.
12 Gün batbığanda onişgiler Aysoniği yanına gilı,
Aña “Çoxur iler kiş oturmığan yüründe volğanniği,
kişxobannı dohulıyü#05825fuğuda,
izler bu cağındağı ağıllıra ma kiş oturğan yürüne yiğüsı ma yatqusı yürü işdeme varğı” edici.
13 Ese Ayso ulıra “Seler ulıra yiğüsı ver” edici.
Resullar “Piser heme kişlere lemi alma varsa demese,
emex beş ma balux işgiden daşı pisere heşbeşor yoxdır” edici.
14 Anda erkişçüx beş miñ kemasor volcı.
Ayso muritlarına “Ularnı bur bölüm bur bölüm zoğzat,
bur bölümde elli kiş kemasor volğı” edici.
15 Muritları hem eli itı,
heme kişnı yere zoğzatcı.
16 Ayso emexçüx beçisını ma baluxçüx işgisını çutı,
asmana öşarı shükür dovu etci.
İnci U ularnı kitqalı,
kişxobanniği iline qoyberğine vulı ularnı muritlarına verci.
17 Heme kişler yiyi xosağı döyci,
qalğan emex uşaxlarnı yığsa,
uşağı on işgi kalı dolcı.
Petrus Mesihnı iqrar etganı
18 Bur gez Ayso izicüğü dovu qılbur,
muritları hem Ala burlığı var.
Ayso ulıra:
“Kişler Minı kem ira edeba ri?”
ede sorcı.
19 Ular cavap virı “Burisılar Yaxıyı Arışsuca deba,
burisılar İlasa deba,
nene burisılar qedimdiği peyğemberlerden burı dirilmiş deba” edici.
20 Ayso nene ulıra “Ene seler Minı kem ira edibur ri?”
ede sorcı.
Petrus “Sen Xudaniği Mesihi ira” ede cavap verci.
21 Ayso anı bur kişe da yenşıbermiğüsını ulıra ana-mana kolı
22 “Adam Oğlı azap artux görğü keler,
hem da xarısılar,
ulı ruhaniler ma qanun-tişlengucılar kelimi Anı üldürqalı,
üçünci güne U dirilğü keler” edici.
Aysoğa ireşgusı yarmağı
23 İnci U ular yogosına beli edici:
“Kem Miniği ardıma ireşqusı gelse,
u izını kelemağıda her gün shızıcasını kötgide,
Miniği ardıma ireşgi.
24 İzıniği canını cuulaqusı giğüci anı şıqıtar,
ese Maña vulı izıniği canını şıqıtqucı anı cuular.
25 Kiş bu püştün dünyanı uzqalı iz canını şıqıtsa ya da yalıtsa,
aña nañ haydi var ri?
26 Kem Miniği sebebimden ma Miniği gahcımniği sebebinden uyansa,
Adam Oğlı hem İzıniği,
dağı Abasıniği ma muqaddes melyayikelerniği şerifusı işinde gelğende,
şu kişniği sebebinden uyınar.
27 Men shıxoçüx selere yenşağı:
munda tixingucılardan burisı Xudaniği Vañgosını görmiğünçüxor ülmes.”
Aysoniği görünüşü bellenganı
28 Bu gahcılarnı yenşıqalı sakis gün kemasordan ardı Ayso Petrusnı,
Yaxıyını ma Yaqubinı İzıla burlığı başlı,
dağqa dovu qılma çıxbarcı.
29 Ayso dovu qılğanda yüzüniği görünüşü bellenci,
Aniği biqırağı hem göz qamaşdırğu kema axaçüx volcı.
30 Anda kiş işgi Ala gepleşba,
ular Moso ma İlası ira.
31 Ular şerifu işinde göranı,
Ayso Yerusalimde pütgusı işnı — Ayso dünyadan garlanbarğusını yenşışba.
32 Petrus ma yanındağı cabları ağırlığına uxlamış.
Ese ular uxudan oyangilı,
Aysoniği şerifusını ma Aniği yanında tixingen kişçüx işgisını görci.
33 U işgisı Aysoniği yanından cañ garlanbarğur diğende,
Petrus izı nañ edeğanını olanmiçüx Aysoğa “Usdat!
Piser munda volğanı yola varcı.
Piser çadır üsh qurğı,
Saña bur,
Mosoğa bur ma İlasığa bur” edici.
34 Petrus bularnı yenşığan vaxda,
bulut bur gilı ularniği iştına örtci.
Ular bulut işine girğende xorğacı.
35 İnci bulutçüxden ünor çıxgilı “Bu Miniği Oğlımdır,
Miniği Dañnığanımdır,
seler Aniği gahcasını diñne” edici.
36 Yenşığan ünçüx basınqanda,
ular Ayso İzı bur kişçüx volğanını görci.
İnci ular ünü çıxgimi oturcı,
hem da izler görğanını u günlerde bur kişe da yenşıbermacı.
Arı emesgen ruxu çutqan avu'ornı voldurğanı
37 Ardı güne ular dağdan engiqalı,
Aysoğa limañ kişxobanor uçıracı.
38 Kişxoban arasından kişor beli zıqıracı:
“Mutalim,
Saña men bur yarılğı,
miniği oğlımnı bur vax,
u miniği burçüx balımdır.
39 Öşür,
anı arı emesgen ruxu'or çutı,
u lorcıxqı zıqırır.
Ruxuçüx anı silğeqalı,
aniği ağzından momozı çıxgilır;
u anı peyzhi itı andan ancor çıxmur.
40 Ruxuçüxnı qolağıda çıxıryüreği ede men Siniği muritlarıña yarılcıçı,
ular çıxırınmur.”
41 Ayso “Ey iman etmeğen ma eğirlengen goñyındağı kişler!
Men qahalğına yetgoñ selerla burlığı volı selernı da dalınqur ra?
Oğlıñnı bele ahdiği” edici.
42 Avuçüx Aysoniği yanına gelğende,
cin anı yere vurı silğici.
Ayso arı emesgen ruxuçüxnı xalı,
balaçüxnı voldurqalı anı abasına colıberci.
43 Xudaniği ulı volğanı heme kişlere şıça volcı.
Kişlere Aysoniği etgen heme işları heyran volğanda,
Ayso İzıniği muritlarına beli edici:
44 “Bu gahcılar selerniği qulaxlarıña siñgi:
Adam Oğlını kişniği ilına colıberer.”
45 Ese Muritları bu gahcaçüxnı olanmacı,
bu gahcaçüxniği manisını ular olanmağı ede ulardan yaşırcı.
Ular xorğı,
Aysoğa bu gahcaçüxnı añnaşınmacı.
Kem ulıdır?
46 Muritler izlerniği arasında ulicüğü kem volğa ede zıqırışcı.
47 Ayso ularniği yiriğindiği sumurlaşını bilqalı,
kiçi balornı başlıgilı,
anı izıniği yanında tixindirci.
48 İnci U ulıra “Kem Miniği adımla bu kiçi balanı zelese,
Minı zelibur.
Kem Minı zelese,
Minı Dohulıyüreğücinı zelibur.
Selerniği arasıñda aşax volğucı ulıdır” edici.
49 Yaxıyı lan virı “Usdat,
ipser Siniği adıñla cin qolığan kişor görci,
ese u ipserla burlığı ireşmeğenniği,
ipser anı tuscı” edici.
50 Ayso aña “Anı tusma!
Kem selere axqurlımısa,
u selerla volbur” edici.
Samariya kişler Aysonı zelemeğanı
51 Asmana ahbığan günü yaxınlanqanda,
Ayso Yerusalime varğusını dıñnı yola çıxcı.
52 Ayso xebercilernı İzıniği iline dohulıyüreci.
Aysoğa belen etgine vulı,
ular varqalı Samariya kişniği ağılora girbarcı.
53 Ayso Yerusalime vaxı yürğenniği,
Samariya kişler Anı zelemacı.
54 Muritları Yaqubi ma Yaxıyı munı görü “Rab,
bularnı yoxqan etgine vulı,
Sen ipsemnı asmandan ot yağdır ede emir ettirqusı gilır mu?”
edici.
55 Ese Ayso çürengilı ularnı xalacı.
56 İnci ular başqı ağıla varcı.
Aysoğa ireşgucılarniği yarmağı
57 Ular yolda yürğende,
kişor Aysoğa “Sen qala varsa,
men Siniği ardıña ireşgur” edici.
58 Ayso aña “Tülüğülere oña var,
asmandağı quşlıra hem oña var.
Ese Adam Oğlına İzıniği başını qoyğu yüror yoxdır” edici.
59 Ayso başqası burına “Miniği ardıma ireş” edici.
Ese u kişçüx “Ey Rab,
men varğıda,
aardı abımnı bur gömgiği” edici.
60 Ese Ayso aña “Ülüler izlerniği ülülarını gömgi,
sen ese varda Xudaniği Vañgosını yenşıdıver” edici.
61 Nene bur kişor “Ey Rab,
men Siniği ardıña ireşgur,
ese men aardı öyümdiğilerla bur garlanışgelğine vulı,
Sen maña kuxanor ver” edici.
62 Ese Ayso aña “Sovana ilını qoyı ardına öşürğüci Xudaniği Vañgosıniği fushısını etgine yarışmas” edici.