Yüzlüxcinlerden iyitgusını cıngo etganı
12
U vaxda kişler miñ-tümen yığıngilı,
bur-burını basışqu kema volcı.
Ayso aardı izıniği muritlarına yenşıma başlacı:
“Seler izıñlarnı Fariseylerniği qordañından iyit,
şu ularniği yüzlüğü idır.
2 Yaşırğan işor aşgırığa çıxgimeğanı yoxdır,
yaşınqan işornı bilmeğanı hem yoxdır.
3 Eli etgenniği seler qarıñquda yenşığanıñnı yaruxda işter,
seler qonı bexqalı qulaxqa pısırlığanıñnı ehçix iştından qiyrar.
4 “Ey dosdanlarım,
Men selere yenşağı:
poñnı üldürğenden daşı heşbeşor etinmiğücilerden xorğıma.
5 Ese kemden xorğağusını Men selere görğesbiği:
kiş poñını üldürqalı dozaxqa cağağusı qañçen Volğucıdan xorğı.
İdır,
Men selere yenşağı:
seler Andan xorğı!
6 Öyseci beşnı sarıtiş helli işgiğea satuxdır mi?
Ese ulardan burını da Xudaniği ilinde unutmas.
7 Selerniği başıñdağı sacıñnı da aricüğünı sanacı.
Xorğıma,
seler yarağor öysecilerden dağı zhıguydır.
8 “Men selere yenşağı:
kem Minı kişlerniği ilinde chınrın etse,
Adam Oğlı hem anı Xudaniği melyayikelarıniği ilinde chınrın eter;
9 ese Minı kişlerniği ilinde chınrın etmiğücinı dese izını da Xudaniği melyayikelarıniği ilinde chınrın etmes.
10 Adam Oğlına axqurlığan gahcı yenşığan her kişnı afu eter,
ese Muqaddes Ruxuğa axqurlı küfür etgucını afu etmes.
11 Kişler selernı eybadet-öye,
beğlerniği ma höküm sürğücilerniği iline ahbığanda,
izıñlarnı niçixli ma nañla axlağur ri,
nañ yenşağur ri ede qım yime.
12 Muqaddes Ruxu selere u vaxda nañ yenşağu keliğüsını örğetberer.”
Aqıl yoxqan bar kiş bifañı
13 Kişxoban arasından kişor Aysoğa “Mutalim,
miniği gagıma bur yenşıda u mila ısgı bur ülüşgi” edici.
14 Ayso aña “Ey sen bu kiş,
kem Minı selerniği iştıña qazuya mu aracığa qoycı?”
ede sorcı.
15 Ayso nene ulıra “Kişniği canını aña neychan nehçi volğanından vaxmığanniği,
seler sugu et,
izıñlarnı dürlüx dürlüx aşgözlüxden iyit” edici.
16 İnci Ayso ulıra bifañ bur yenşıberci:
“Bur bar kişorniği astından coñgi cıxıñ gimiş.
17 U kişçüx izıniği yiriğinde ‘Maña aşlağımnı yığqu yür yoxqanniği,
men niçix etgu ri?’
ede sumurlamış.
18 U dağı beli edimiş:
‘Men beliği etgur:
men qazınaxlarımnı tadıqalı,
ulardan da dadağı örtgur.
İnci men aşlağım yogosını ma vocanlarımnı aña yığqur.
19 Men da izıma:
“Ey canım,
saña yarağor yıla dañnağusı vocan var.
İnci sen diñ,
iş,
yi,
dağı da cıdlı” ediğür.’
20 Ese Xuda aña ‘Ey aqıl yoxqan!
Büğci siniği canıñnı senden albur.
İnci sen izıña vulı belen etganıñ keme qalar ya?’
edimiş.
21 İzığa vulı neychan yığı,
Xudağa dese bar emesgen kiş eliği volar.”
Qım yime
22 Ayso İzıniği muritlarına beli edici:
“Eli etgenniği Men selere yenşağı:
nañ işgur ri ede canıña vulı qım yime,
nañ giyğür ri ede poñıña vulı qım yime.
23 Can lemiden da yocındır,
poñ giyğüsından da yocındır.
24 Qarğılıra bur öşür:
ular ixin ixuxdır,
hem yığuxdır,
ulıra yığqusı yür yoxdır,
qazınax hem yoxdır;
ese Xuda ularnı asırabur.
Seler quşlardan da nehçi zhıguy emesa ri!
25 Selerden qaysı burıñ qım yiqalı,
canıñnı bur zaman uzaxlandırınar ri?
26 Seler kiçiçüx işornı da etinmese,
neğe başqasılıra qım yibur ri?
27 Bayxı cicexler niçixli çañnığanına bur öşür:
ular iş ituxdır,
yipex hem eğiruxdır.
Ese Men selere yenşağı:
Süleyman izıniği püştün şerifusında volğanda,
bularniği burı kemasiğor da giyinmacı.
28 Buğün çelde volı ettisı luzığa cağılğan çöpnı da Xuda eli giydirse,
selernı yohodiğine giydirmeğa ru,
ey imanı kiçiler?
29 Seler nañ yiğür ri ma nañ işgur ri ede tıñnınma,
xosağıñ hem qızışma.
30 Bu heme işlere vulı dünyadağı heme iman etmeğen milletler tıñnınba,
ese bular selere keliğüsını selerniği Abıñ bilbur.
31 Seler Xudaniği Vañgosını işde,
inci ularnı selere verer.
32 “Xorğıma,
ey kiçi sürüm!
Selerniği Abıñ Vañgosını selere verğine galıba.
33 Neychanlarıñnı satda sedeqe ver.
İñsılıra esgilenmeğen helli kuğü — asmanda carı dosunmığan seybe belen et,
anda oğrı yaxılanmas,
güye hem yimes.
34 Selerniği seybeñ qada volsa,
yiriğiñ hem anda volar.”
Bilmeğen gün ma vax
35 “Seler bilıña burğaxnı burğan,
çıraluxlarıñnı deşdir;
36 hem da doyıdan yangelğen iyisına güyüğüciler kema vol.
Ular izlerniği iyisı yangilı qonı sholığanda ma,
aña dego qonı aşbiğine güyüba.
37 İyisı yangelğende sugu etqalğan carıxcılarını görse,
u carıxcılar bextlidır.
Men shıxoçüx selere yenşağı:
ularniği iyisı bilına burğax burğanı,
ularnı şırı qırğına zoğzatı,
izı gilı ularnı fushılar.
38 İyisı yarım gecide mu tuxmañda gilı carıxcılarıniği sugu etqalğanını görse,
bu carıxcılar bextlidır.
39 Ese munı bilduğu:
öyniği iyisı oğrı qahçañ giğüsını bilse,
u izıniği öyüne oğrı giğirmes.
40 Seler hem belen vol,
neğe dese Adam Oğlı selerniği gövnüñe gelmeğen vaxorda geler.”
41 Petrus “Rab,
Sen bu bifañnı ipsereçüx yenşabur mu mana yenşabur ri?”
ede sorcı.
42 Rab beli edici:
“İz iyisıniği sadiq ma aqılli guancası kem'a ri?
Anı iz iyisıniği carıxcılarına vaxında azuğunı viğüciğe qoyar.
43 İyisı gelğende eli etgen carıxcını görse,
bu carıxcı bextlidır!
44 Men shıxoçüx selere yenşağı:
aniği iyisı bu carıxcını püştün neychanını iyitgucığa qoyar.
45 Ese u carıxcı iz yiriğinde ‘Miniği iyim yırğanı gelğa’ ede,
başqı yoğcılarnı ma yoğmularnı diyı,
iz damağına yiyi,
işi zuylansa,
46 aniği gövnüne gelmeğen günorda,
u bilmeğen vaxorda u carıxcıniği iyisı geler.
İnci aña ceza ağırlığına virı,
anı sadiq emesgen kişla bur yüründe qoyar.
47 İyisıniği sağınqanını bilı belen etmeğen ma aniği sağınqanına ire etmeğen carıxcını artuğunda deyer.
48 Ese bilmiçüx deyğüsı babılığan işnı etgucını azında deyer.
Keme artux verse,
andan artux xeyderer;
keme artux colıberse,
andan artux keler.
49 “Men zimene ot yağdırma gelci.
U incox otda yanqına Men nehçi ümit dartuxua ri!
50 Maña arışsu alğusı bur var,
anı pütgunçüxor Men bur uslır ra!
51 Seler Minı zimen iştına salim ahgiğine vulı gimiş edibur mi?
Ahıñ,
Men selere yenşağı:
Men böleniş ahgiğine vulı gelci.
52 Mundan ardı bur zahsañda volğan beş kiş bölener,
üçüsı işgisına axqurlar,
işgisı hem üçüsına axqurlar.
53 Ular bölyanı abı oğlına axqurlar,
oğıl abasına axqurlar;
amı qızına axqurlar,
qız amasına axqurlar;
qaynı-amı oğlan-kinına axqurlar,
oğlan-kin qaynı-amasına axqurlar.”
Alyametlernı vax bilğüsı
54 Ayso kişxobanlıra beli edici:
“Gün-batqan-sardan bulut çıxgiğanını görğende ma,
seler dego ‘Boğnax yağmur yağqa’ edir,
eliği hem vulır.
55 Nanbangeden yel xotqanda seler ‘Asman cıxıñ ıssı volğa’ edir,
eliği hem vulır.
56 Ey yüzlüxcinler,
asman ma zimenniği görünüşünı seler niçix vaxqusını bilba ma,
nene çoxurğı zamannı seler neğe vaxı bilmur ri?
57 “Doğrı işnı seler neğe iñsılıra vaxı bilmur ri?
58 Seler iñsılarniği cayañla bili beğniği yanına varğanda,
yolda volğandox tıñnında ala yaxşılaşduğu.
Edemese u sinı qazuyniği yanına süriqular,
qazuy sinı kiş bexliğüciğe colıbiqular,
kiş bexliğüci sinı banfaña bexliqular.
59 Men saña yenşağı:
ardı quruxcüğündiği kiçicüğü sarıtiş hellinıb xollağunçüxor,
sen andan xaxo çıxgelinmes.”