Töbe et
13
U vaxda kiş bici gilı,
Pilatus üldürğen Celile kişlerniği işinı Aysoğa yenşıberci.
Pilatus u Celile kişçüxlernı üldarı,
ularniği qanını izlerniği verğen qurbanlarına qarışdırmış.
2 Ayso ulıra beli cavap verci:
“Bu çosı Celile kişler bu azaplarnı görğenniği,
seler vaxsa heme Celile kişlere vaxqan ulıra gunıha ağır vara dibur mi?
3 Ahıñ,
Men selere yenşağı:
seler töbe etmese,
seler yogosıñ ular kema yoxqan volar.
4 Seler vaxsa Yerusalimde oturğan heme kişlere vaxqan Siloyam munar yıxılgilı,
ülğen on sakis kişe gunıha ağır vara dibur mi?
5 Ahıñ,
Men selere yenşağı:
seler töbe etmese,
seler yogosıñ eliği yoxqan volar.”
Yimiş durmığan vuxago dal bifañı
6 Ayso bu bifañnı yenşıberci:
“Bur kişor iz bağında vuxago dal bur zilamış.
Bu kişçüx gilı dalçüxde yimiş işdimişçi,
datmamış.
7 İnci u iz bağını iyitgucığa ‘Öşür,
men üsh yıl gilı bu vuxago dalçüxde yimiş işdiciçi,
datmacı.
Anı cadaduğu,
anı neğe torıxnı lañfiy ettirğür ri?’
edimiş.
8 Bağ iyitgucı aña ‘İyim,
munı bu yılor hem qaldırduğu,
men aniği tönen-qırğını qazağıda anı bur viylağı.
9 Essağün u yimiş dursa,
yola varğa;
durmısa,
inci anı sen cadaduğu’ ede cavap vimiş.”
Şabat güne qadınkişornı voldurğanı
10 Ayso Şabat güne eybadet-öyorda örğetci.
11 Anda ağrıx daxınqan ruxu volı,
on sakis yıl ağırğan qadınkişor volcı.
U cıxıñ yugulanı,
bilını xaxo düzetanuxua.
12 Ayso anı görğende İz yanına çıxrı aña “Ey yengu,
sinı ağrağıñdan azat etci” edici.
13 İnci Ayso ellarını qadınkişçüxniği iştına qoycı.
Qadınkişçüx dego bilını düzçüx tixi,
Xudağa şerifu etci.
14 Ese Ayso Şabat güne ağrıx voldurcı ede,
eybadet-öyniği şüedunı qazaplanı kişxobana vaxı “İş etgine yarığan altı gün var,
u günlerde gelde ağrıxlarnı voldur,
ese Şabat güne eliği etse yarımas” edici.
15 Rab aña “Ey yüzlüxcinler,
selerniği arasıñda qaysı burıñ Şabat güne sıxarıñnı mu eşiğiñnı soğuniği yanından tişi,
yehleqalı surıma varmas si?
16 Bu qadınkişçüx İbrahiminiği qızı volı,
Sheytan anı on sakis yıl bağlamış.
Anı Şabat güne Sheytan bağlığanından azat etse yara'uxua ru?”
ede cavap verci.
17 Ayso bularnı yenşı volğanda,
aña axqurlağucılarnı yogosını uyandırcı.
Kişxoban aricüğü Ayso etgen heme şerifuli işlere söyünci.
Lagi urlux ma gomın qordañ bifañı
18 Ayso nene “Xudaniği Vañgosı naña oxşıba ra?
Men anı naña bilağo?
19 U kişor ahbarı,
iz bağında exgen lagi urlux kemadır;
u çañnı dal kema volı,
asmandağı quşlar aniği budaxlarında oña qoyar” edici.
20 Ayso nene “Men Xudaniği Vañgosını naña bilağo?
21 U gomın qordañ kemadır.
Qadınkişor anı ahbarı üsh kurıa öşgen una qarışdarı,
ariçüx xotqunçüxor qoyar” edici.
Dar qo
22 Ayso Yerusalime varğan yolında,
şeherlerniği ma ağıllarniği işinden ötbarı örğetci.
23 Kişor Aña “Ey Rab,
azırax kişnıçüx dacuu etga ru?”
ede sorcı.
Ayso ulıra beli edici:
24 “Dar qodan girğine vulı tıñnın.
Men selere yenşağı:
eli yarağor kiş girı vaxarçı,
ular girinmes.
25 Öyniği iyisı xotqalı qosını dıñnığanı,
seler daşında tixanı qonı sholı ‘Ey iyim,
pisere qonı bur aşdıver’ eder.
U selere vaxı ‘Seler qadan gelğanıñnı men bilmes’ ede cavap verer.
26 İnci seler ‘Piser sila burlığı işci yici.
Sen da ipsemniği gedolarımda örğetci’ eder.
27 İnci u selere ‘Ey yogo yemenlix etgucılar,
seler qadan gelğanıñnı men bilmes,
miniği yanımdan sıcırı!’
eder.
28 Seler İbrahimi,
Issaqı,
Yaqubi ma heme peyğemberler Xudaniği Vañgosında volğanını,
ese izıñlarnı daşına qolığanını görğende,
anda yağlağusı ma tiş qacaşdırqusı volar.
29 Kişler gün-çıxqan-sardan,
gün-batqan-sardan,
beybangeden ma nanbangeden gilı,
Xudaniği Vañgosında şırı qırğında oturar.
30 Öşür,
ardicüğündiğiler ilicüğünde volar,
ilicüğündiğiler ardicüğünde volar.”
Yerusalime yas etganı
31 Cañ u vaxda Farisey bici gilı Aysoğa “Mundan garlanda varduğu,
Herodes Sinı üldürğür deba” edici.
32 Ayso ulıra beli edici:
“Seler varda u tülüğüğe yenşıdıver:
Men buğün ma ette cinlernı qolağur,
ağrıx vaxı voldurğur,
üçünci güne işimnı püter.
33 Ese buğün,
ettisı ma andan ardı güne Men yolımnı yürğü keler,
neğe dese peyğember Yerusalimden daşında ülğüsı emesdır!
34 Ey Yerusalim,
ey Yerusalim!
Peyğemberlernı üldürğen ma izıña dohulıyüreğen kişnı daşla vurı üldürğen şeher!
Anaş toğulılarını qanatlarıniği cüyüne yığqan kema,
Men hem nehçi gez siniği balılarıñnı yığqusı giluxua ri,
ese sen onamur.
35 Öşür,
selerniği öyüñnı çöybarbur.
Men selere yenşağı:
seler ‘Rabniği adıla Giğüciğe halqış volğı!’
ediğünçüxor,
seler Minı inci görmes.”