Poñı çişgen kişornı voldurğanı
14
Bur Şabat güne Ayso Fariseylerniği başcılarından burıniği öyüne lemi işme varcı,
ular Anı aşgıraçüx gözlici.
2 Aysoniği ilinde sarı-su yığanı poñı çişgen kişor volcı.
3 Ayso qanuncılıra ma Fariseylere “Şabat güne ağrıx vaxsa yarıba mu yara'uxua ra?”
ede sorcı.
4 Ese ular qarı ağzını aşmacı.
Ayso u kişçüxe ilıla diği,
anı ornına endarı dohulıyüreci.
5 İnci Ayso ulıra “Selerniği arasıñdan kemniği oğlı mu sıxarı Şabat güne ziñ işine çüşbarsa,
u dego anı dartı çıxırgelmes si?”
ede sorcı.
6 Ular bu işlere lanor verinmacı.
Aşax etgusı ma ulı etgusı
7 Ayso qonaxqa giğücilerniği baş ornını dañnı oturğanını görğende,
ulıra bifañ bur qoyberci:
8 “Başqımayı sinı doyığa çıxrığanda baş ornıda oturqıma,
doyıniği iyisı senden da hörmetli qonaxor çıxrığanı volsa choñ.
9 Sen ma u kişçüx işgisıñnı da çıxrığan doyıniği iyisı gilı,
saña ‘Siniği ornıñnı bu kişçüxe bur verduğu’ ediqular.
İnci sen uyanı aşacüğü ornıda oturğu keler.
10 Andan-tigi sinı çıxrığanda,
varda aşacüğü ornıda otur;
sinı çıxrağucı yanıña gelğende saña ‘Yarıbacım,
mundan da orisında otur’ ediği.
İnci sila burlığı şırı qırğında oturğucılar yogosıniği ilinde saña hörmet volar.
11 İzını ulı etgucornı aşax eter,
izını aşax çutqucornı ulı eter.”
Ulı şı tıñnığanı bifañı
12 Ayso dağı İzını qonaxqa çıxrağucığa beli edici:
“Sen öylelüx ma gecilüx tıñnığanda,
izıñniği dosdanlarıñnı,
gagı-inilarıñnı,
danışlarıñnı ma bar hamzayılarıñnı çıxrıma,
edemese ular hem sinı çıxrıbarı,
siniği sovabıñnı yandırbiqular.
13 Ese şı tıñnığanda yox kişlernı,
loxdılanqucılarnı,
axsaxlarnı ma qorılarnı çıxrı.
14 Ular saña şı tıñnınmığanniği,
seler bextlidır;
doğrı kişler fushın etgen vaxda saña sovap değer.”
15 Şırı qırğında Ala oturğucılardan burı munı işteqalı Aysoğa “Xudaniği Vañgosında lemi işgucor bextlidır!”
edici.
16 Ayso aña beli edici:
“Bur kişor ulı şı tıñnı,
yarağor kişnı çıxramış.
17 Lemi vaxda çıxrılğan qonaxlıra ‘Gel,
yogonı belen itı volcı’ ede gahcı veryüreğine vulı,
u izıniği carıxcısını dohulıyüremiş.
18 Ese ular yogosı kax işdimiş.
İlicüğündiği aña ‘Men ast bur alcı,
men anı vaxma varğu keler.
Minı bur afu etduğu’ edimiş.
19 Başqası burı ‘Men sıxır beş qoş alcı,
ular niçixli volğanını men vaxma varbur.
Minı bur afu etduğu’ edimiş.
20 Nene burı ‘Men cañ kin alcı,
eli etgenniği men gelinmeğa’ edimiş.
21 Carıxcıçüx yangilı,
bularnı xocasına yenşıbimiş.
İnci öy iyisı qazaplanı carıxcısına vaxı ‘Sen hasgen şeherniği gedolarına ma xandularına varda,
yox kişlernı,
loxdılanqucılarnı,
qorılarnı ma axsaxlarnı muña başlıdiği’ edimiş.
22 Carıxcıçüx ‘Xoca,
sen emir verğanıñnı men etci,
ese dağı da ornı vara’ edimiş.
23 Xocası carıxcısına beli edimiş:
‘Yollıra ma astlıra varda,
kişlernı kañ etde başlıdiğide miniği öyüm dolğı.
24 Men selere yenşağı:
ilicüğü çıxrılğucılardan bur kiş da miniği lemimnı datınmas.’ ”
Murit volğusıniği yarmağı
25 Aysoğa limañ kişxobanlar ireşba,
U ulıra çürengilı beli edici:
26 “Kem Miniği yanıma gilı izıniği abasını,
amasını,
kinını,
balılarını,
gagı-inilarını,
azı-siñnılarını,
dağı da izıniği canını Menden iştına qoysa,
u Miniği muritım volunmas.
27 Kem izıniği shızıcasını kötarı Miniği ardıma ireşmese,
u Miniği muritım volunmas.
28 Selerniği arasıñdan kem munar qurqusı gelse,
anı qurı çıxırgelğine helli dañnığa mu dañnımığa ede,
u aardı zoğzı yarmağını sanı vaxmas si?
29-30 Edemese munarniği dicisını qurqalı munarnı örtü çıxırınmığanda,
munı görğücor ‘Bu kişçüx munı qurma başlacıçı,
munı çıxırınmacı’ ede anı küliqular.
31 Qaysı xoñshoñ başqı xoñshoñla vuruşma varsa,
izı on miñ shıbinla ele yanından vurma gelğen yiğirmi miñ shıbine çıdığa mu çıdımığa ede,
u aardı zoğzı sumurlımas si?
32 U çıdımısa,
bursı xoñshoñ yıraçüxde volğandox,
u aña xeberci dohulıyüre xepin volğusını soruşar.
33 Eli etgenniği selerden kem volsa da püştün neychanıñnı cağımısa,
u Miniği muritım volunmas.