Yalıtqan qoyniği bifañı
15
Heme shuy yığqucılar ma gunıhacılar Aysoniği yenşığanını diñnengine vulı,
aniği yanına yaxınlangelci.
2 Fariseyler ma qanun-tişlengucılar honañlı “Bu Kişçüx gunıhacılarnı zeleba,
ularla da burlığı lemi işba” edici.
3 Ayso ulıra bu bifañnı yenşıberci:
4 “Selerden burıña bur yüz qoy volı ulardan burını yalıtsa,
doqsan doqusunı gañtañda çöybarı,
yalıtqan qoyunı datqunçüxor işdeme varmas so?
5 U anı datsa,
galaçüx yağrı iştına qoyar.
6 U da öyüne gilı,
yaxşı-yürlarını ma hamzayılarını bur yüre çıxrı,
ulıra vaxı ‘Mila burlığı söyün,
men yalıtqan qoyumnı datcı!’
eder.
7 Men selere yenşağı:
doqsan doqus töbe etgu kelemeğen doğrı kişe vaxqan töbe etgen gunıhacı bura vulı,
asmanda hem söyünç eliği volar.
Yalıtqan helli bifañı
8 “Eliği hem ax helli on deraxmea volğan qadınkişor hellisı burını yalıtsa,
u çıralux deşdarı öyünı sürü,
anı datqunçüxor aşgıraçüx işdemes so?
9 U anı datsa,
yaxşı-yürlarını ma hamzayılarını burlığı çıxrı ‘Mila burlığı söyün,
men yalıtqan hellimnı datcı!’
eder.
10 Men selere yenşağı:
töbe etgen gunıhacı bura vulı Xudaniği melyayikelarıniği ilinde hem söyünç eliği volar.”
Yalıtqan oğıl bifañı
11 Ayso nene beli edici:
“Bur kişora oğlı işgi volmış.
12 Kiçi oğlı abasına ‘Aba,
neychandan men imniği ısgımnı maña ver’ edimiş.
İnci abası neychanını u işgisına ülüşbimiş.
13 Andan nene bici gün volqalı,
kiçi oğlı heme vocanlarını yığı yırıx zimenora varmış.
Anda u laxcılı otarı neychanını dozatmış.
14 U volğanornı carı dosqalı,
şu zimençüxe ağır açlıx inı,
u yoxlanı tax-tax etmiş.
15 İnci u varı şu zimendiği kişlerden burına iş etmiş.
U kişçüx anı izıniği astına doñus kütme yüremiş.
16 U oğlançüx doñuslar yiğen kisımuxnı damağına bur yiqusı ede ümit dartmışçı,
aña heşbeşor viğüci çıxmamış.
17 U sumurlı ornaşdırqalı,
iz-izığa beli edimiş:
‘Abıma gugun nehçi yoxua ri,
ulıra lemi artı nehçi qaluxua ri!
Ese men munda açıxı ülbur.
18 Men xotqalı abımniği yanına varı aña “Aba,
men asmana ma saña axqurlı gunıha etci.
19 Men inci oğlıñdır ede maña piylımığa.
Minı izıñniği gugunlarıñdan burı kema bur etduğu” ediğür.’
20 İnci u teranı iz abasıniği yanına varmış.
“U da yıraçüx volğandox,
aniği abası anı görü aña iş köymiş;
inci u yügürbarı oğlını boynundan xuçıxlı mödimiş.
21 Oğlı abasına ‘Aba,
men asmana ma saña axqurlı gunıha etci.
Men inci siniği oğlıñdır ede maña piylımığa’ edimiş.
22 Ese abası carıxcılarına ‘Hasgen,
yaxşicüğü donnı ahdiğide aña giydir,
burmağına gicir daxdıver,
ayaxlarına xay giydir.
23 Simus buzını ahdiğide carı,
iler yiyalda galışal.
24 Miniği bu oğlım ülmişçi,
nene dirilci;
anı yalıtcıçı,
inci datcı’ edimiş.
İnci ular galışmış.
25 “Aniği ulı oğlı ese çelde volmış.
U yangilı öyüne yaxılıbığanda,
çalğan saz ma oynığanını iştimiş.
26 İnci u carıxcılardan burını yanına çıxrı,
nañ iş volğanını sormış.
27 Carıxcıçüx aña ‘Siniği iniñ gimiş.
U sıxçüx yangelci ede,
abıñ simus buzını carıcı’ edimiş.
28 Ulı oğıl acığı gilı,
işine girbarqusı gelmamış.
Abası daşına çıxgilı anı çöllimiş.
29 Ese u iz abasına cavap virı beli edimiş:
‘Öşür,
beliğor yıl men sinı fushılı,
emriñnı yere çirğanor yoxdır.
Sen maña yaxşı-yürlarımla galış ede,
ovlaxor da verğen yoxdır.
30 Ese cinülere siniği neychanıñnı carı dosqan şu oğlıñ gelğende ma,
sen aña simus buzını caraqumış ma!’
31 Abası aña ‘Oğlım,
sen geşgünçüx miniği yanımda var,
maña volğanor siniğidır.
32 Ese siniği bu iniñ ülqalı dirilci,
anı yalıtqalı datcı,
eli etgenniği inci galı söyüngu keler’ edimiş.”