Aysoniği qañını soruşdurğanı
20
Bur gün Ayso eybadet-sarıda xalqığa örğetbur,
Yaxşı Xebernı hem vası etbur;
ulı ruhaniler ma qanun-tişlengucılar xarısılarla burlığı gelci.
2 Ular Aysoğa “Pisere bur yenşıdıver,
Sen bu işlernı nañ qañla etbur ri?
Saña bu qañnı viğüci kemdır ri?”
ede sorcı.
3 Ayso ulıra “Men hem selere gahcor sorğı,
seler Maña bur yenşıdıver;
4 Yaxıyıniği arışsusı asmandan gimiş mu kişden gimiş şi?”
ede lan verci.
5 Ular izlerniği arasında “İler ‘Asmandan’ edese,
U ‘Ene seler neğe anı yılımacı?’
edeğa.
6 Ese iler ‘Kişden’ edese,
püştün xalqı Yaxıyını peyğember ira ede yılığanniği,
ular ilernı daşla vurquğa” ede soruşcı.
7 İnci ular Aysoğa “U qadan gelğanını piser bilmes” ede cavap verci.
8 Ayso ulıra “Ene Men hem bu işlernı nañ qañla etganımnı selere yenşıbermes” edici.
Puto bağ demniğüciler bifañı
9 Ayso xalqığa bu bifañnı yenşıberci:
“Bur kişor puto bur bağor zilı,
anı coñgilcilere demnebirı,
izı qo çıxı udamış.
10 Vaxı yetgende puto bağındağı yimişinden izığa ular viği ede,
u carıxcısı burını bağını demniğücilerniği yanına dohulıyüremiş.
Ese demniğüciler anı diyı quriçüx yandıryüremiş.
11 Bağ iyisı nene başqı carıxcı bur dohulıyüremiş,
ese ular anı da diyı,
kemencılıqalı quriçüx yandıryüremiş.
12 U üçünci carıxcısını hem dohulıyüremiş,
ese ular anı da nad itı qolıyüremiş.
13 İnci bağ iyisı ‘Men nañ etgu ya?
Men izımniği açışqan oğlımnı dohulıyüreğür,
ular aña hörmet etse choñ’ edimiş.
14 Ese demniğüciler anı görğende ma,
izler bur-burıla soraşı ‘Isgı alğucı bu idır.
Gel,
iler anı üldürqulal,
eliği inci bu ısgı ilerniği volğı’ edimiş.
15 İnci ular anı bağdan daşına sürebarı üldürmiş.
Bağ iyisı ulıra nañ etga ra?
16 U gilı bağını demniğücilernı yoxqan itı,
bağını başqı kişlere demneberer.”
Xalqı munı işteğende “Eli bur volmağı” edici.
17 Ayso ulıra öşarı “Ene
‘Öy örtgucılar cağığan daş
Dumcuxdağı baş daş volcı’
ede pişteğanıniği manisı naña ri?
18 U daşçüxniği iştına çüşgiğen kişor dumbu-dumbu volar;
u daşçüx kemniği iştına çüşgelse,
anı yincer” edici.
19 Qanun-tişlengucılar ma ulı ruhaniler bu bifañçüxnı Ayso izlere axqurlı yenşığanını bilğenniği,
ular u vaxda Aysoğa el qoyğur ede tıñnıncıçı,
xalqıdan xorğacı.
Shuy viğüsını añnaşqanı
20 Ular Aysonı aşgıraçüx gözleqalı,
Aniği yanına doğrı kiş coñnığan gözliğücilernı dohulıyüreci.
Ular Aysoniği gahcasından çutqalı,
Anı zunduniği hökmüne ma qañçinına colıbiğüsı meqsutla varcı.
21 Ular Aysoğa “Mutalim,
piser bilir,
sen doğrılığına yenşı örğetba,
kişniği yüzüne öşarı ituxua,
heqiqete ire Xudaniği yolını örğetba.
22 Ene ipsem kaysağa shuy colısa yarıba mu yara'uxua ri?”
ede sorcı.
23 Ayso ularniği guydosını vaxı çıxırgilı ulıra
24 “Seler Maña dinar bur görğes.
Muniği iştındağı suret ma piştix kemniği'a ri?”
edici.
Ular “Kaysaniği'a” edici.
25 Ayso ulıra “Ene kaysaniğinı kaysağa ver,
Xudaniğinı Xudağa ver” edici.
26 Ular xalqıniği ilinde Aysonı gahcasından çutunmacı;
Aniği cavabına ular heyran volı,
ularniği soluğu çıxgimacı.
Fushın etgusını sorğanı
27 Ülümden ardı fushın volğanını chınrın etmeğen Sadukeylerden bici Aysoniği yanına gilı,
Aña beli sorcı:
28 “Mutalim,
Moso ilere ‘Bur kişorniği gagı-inisı kin alqalı balı çıxmiçüx ülse,
u kişçüx gagı-inisıniği bu gohosını kin alı,
ülğen gagı-inisına xuurın qurbiğü keler’ ede piştebimiş.
29 Mundan ili gagı-ini yıdı volmış.
Ulicüğü kin alqalı balı çıxmiçüx ülmiş.
30 Exincisı ma
31 üçüncisı hem u qadınkişçüxnı kin almış.
Beliği u yıdısı yogosı anı kin alı,
balı çıxmiçüx ülmiş.
32 Ardicüğü u qadınkişçüx hem ülmiş.
33 İnci fushın etgende u qadınkişçüx ulardan kemniği kinı volğa ri?
U gagı-ini yıdısı aricüğü anı kin almış ma.”
34 Ayso ulıra beliği cavap verci:
“Bu dünyadağı kişler kin albur,
kişe hem çıxbarbur.
35 Ese u giğüsı dünyağa ma ülümden fushın etgine piylığan kişler dese kin almas,
kişe hem çıxbımas.
36 Ular melyayikeler kema volğanniği,
hem da ular Xudaniği oğlan ma fushınniği oğlan volğanniği,
ular inci ülünmes.
37 Moso da ot deşgen tigen shomunı gilığanında Rabnı İbrahiminiği Xudası,
Issaqıniği Xudası ma Yaqubiniği Xudası ede çıxrığanda,
ülüler fushın etilğanını görğesci.
38 Xudağa dese man diri eğenniği,
Xuda ülülerniği Xudası emesdır,
ese dirilerniğidır.”
39 Qanun-tişlengucılardan burisı “Mutalim,
sen shundunlığına yenşacı” edici.
40 İnci ular Aña heşbeşor sorunmacı.
Mesih kemniği Oğlı?
41 Ayso ulıra beli edici:
“Kişler Mesihnı niçix Davudiniği oğlıdır deba ri?
42-43 Davudi izı Zebur kitabında
‘Rab miniği İyime vaxı
“Men siniği düşmenlarıñnı
Ayaxlarıña bandıñ qoybiğünçüxor,
Sen Miniği sıx yanımda oturdığı” edir’ edeba.
44 Davudi Anı ‘İyi’ ede çıxrıba ma,
U niçix Davudiniği oğlı volğa ri?”
45 Püştün xalqı diñnengende,
Ayso İz muritlarına
46 “Qanun-tişlengucılardan iyit.
Ular uzun donnı giyi ilanqusı giba,
hem da cıshıda izlere salim verğine,
eybadet-öyde hörmet ornığa ma şıda baş ornığa galıba.
47 Ular goholarniği öylarını uxı izler etba,
göze görüngine vulı uzaxlığına dovu etba.
Bu kişlere ceza ağırlığına volar” edici.