Aysonı üldürğüsını qast etganı
22
Pesax ede çıxrığan Sımın Emex ayt yaxılacı.
2 Ulı ruhaniler ma qanun-tişlengucılar Aysonı niçixli üldürğüsı yolor işdeba,
ese ular xalqıdan xorğacı.
3 Sheytan onişgilerden burı,
adını İskariyot çıxrığan Yudaniği yiriğine girci.
4 U varı ulı ruhaniler ma eybadet-sarını sıxlağucılarniği dambasılarıla Aysonı niçix ulıra colıbiğüsını soruşcı.
5 Ular bu işe galacı,
dağı aña helli viğüsına bura qoycı.
6 Yuda hem aña onacı,
inci kişxoban yoxmığan vaxda Aysonı ulıra colıbiğüsı hurumor işdici.
Pesax lemi
7 Pesax quzını qurban carağu keleğen Sımın Emex ayt günü yetci.
8 Ayso “Varda Pesax leminı iler işgine vulı belen et” ede,
Petrus ma Yaxıyını dohulıyüreci.
9 Ular Aña “Sen ipsemnı qada anı belen ettirqusı gilır ri?”
ede sorcı.
10 Ayso ulıra “Seler şehere girbığanda,
su dalaxor kötgen kişor uçırar.
Seler aniği ardına ireşde,
u qaysı öye girse,
11 u öyçüxniği iyisına seler ‘Mutalim saña “Qonax oturğu yür qada var ri?
Anda Men muritlarımla Pesax leminı işgi” ede sorba’ ede.
12 İnci u selere rovax iştı bur siñde saxıt lallı belen etgen dadıx shohunor görğesberer.
Seler anda belen et” edici.
13 Ular varı heme işler Ayso izlere yenşıberğen kemaçüx volğanını görci,
inci ular Pesax leminı belen etci.
14 Lemi vaxı yetgende Ayso ma resulları burlığı şırı qırğına oturcı.
15 Ayso ulıra “Men azap görğenden ili,
bu Pesax leminı selerla burlığı bur işgi ede cıxıñ arzu etci.
16 Men selere yenşağı:
Xudaniği Vañgosında Pesax pütgunçüx,
Men inci munı işmes” edici.
17 İnci Ayso biyzı bur çutı shükür etqalı “Munı alda seler ülüşde işduğu.
18 Men selere yenşağı:
Mundan ardı Xudaniği Vañgosı giğünçüx puto dalniği yimiş susundan men inci işmes” edici.
19 U emex çutı shükür itı,
anı kitqalı ulıra virı “Bu Miniği selere vulı verğen poñımdır.
Munı seler Minı gilığına vulı et” edici.
20 U gecilüxden ardı biyzını hem eliği çutı “Bu biyzı Miniği selere vulı şorlığan qanımla etgen yañı ahitdır.
21 Ese öşür,
Minı chumay etgucıniği ilı Miniği ilımla şırıda burlığı var.
22 Adam Oğlı dese ilyoxdan dinran etgen işe ire dünyadan yanar;
ese Adam Oğlını chumay etgucığa belyodır!”
edici.
23 Muritları munı kem etgu roñ ede izler arasında yenşışcı.
Ulicüğü kem?
24 Muritler izlerniği arasında kemnı ulicüğü etgusını cañnaşcı.
25 Ayso ulıra beli edici:
“Milletlerniği xoñshoñları ularniği iştında höküm sürbur,
ularniği iştında qañçen volğucılarnı niñ-viğüci ede çıxrabur.
26 Ese seler eli etme.
Selerniği arasıñda ulicüğü kiçicüğü kema vol,
dambasılar fushılağucılar kema vol.
27 Qaysı ula ri,
şırı qırğında oturğucı mu fushılağucı?
Şırı qırğında oturğucı ulı emesdır mi?
Men ese selerniği arasıñda fushılağucı kemadır.
28 Koyen etganılar Maña gelğende,
Miniği yanımda qalğucı selerdır.
29 Abım Maña vañgonı colıberğen kema,
Men hem selere colıbibur;
30 eliği inci seler Miniği Vañgomda Miniği şırımda işgide yiği,
seler dağı taxtlar iştında oturqalı,
İsra'ilniği on işgi bulosına hukun çıxırar.
Petrusniği danımas ediğüsını yenşığanı
31 “Simun,
Simun!
Sheytan selernı boğdı kema shilığına vulı kelici.
32 Men ese sen imanıñ cağımağı ede,
saña vulı dovu qılcı.
Sen yangelğen vaxda ağinilarıñnı todañlandır.”
33 Simun Aysoğa “Ey Rab,
men Sila burlığı banfaña girğüsına ma ülüme varğusına da belen etbur” edici.
34 Ayso “Petrus,
Men saña yenşağı:
buğün tux mañrağunçüxor,
sen Minı danımas ede üsh gez chınrın etmes” edici.
35 Ayso ulıra nene “Men selernı helli kuğü yoxmi,
xab yoxmi ma xay yoxmi dohulıyüreğende,
selere dañnımığanor var ro?”
ede sorcı.
Ular “Yoxdır” edici.
36 Ayso ulıra “İnci ese helli kuğü volğucı anı çut,
xab volğucı hem anı çut.
Qılış yoxmağucı izıniği donını satqıda qılış alğı.
37 Men selere yenşağı:
‘Anı yazuxcılarniği arasına sanacı’ ede pişteğanı Miniği başımda çıxqu keler;
neğe dese Minı pişteğen iş çıxbur” edici.
38 Ular “Ey Rab,
öşür,
munda qılış işgi vara” edici.
Ayso ulıra “İnci volğa” edici.
Ayso Zeytun dağda dovu qılğanı
39 Ayso daşına çıxbarı,
izıniği adetine ire Zeytun dağqa varcı.
Muritları hem Aniği ardına ireşci.
40 Varğan yürüne yetqalı Ayso ulıra “İzıñlar çüseğe çüşmiği edede dovu qıl” edici.
41 Ayso İzı ese daş bur sodısa yetgu kemasiğor yırıxlığına garlanbarı,
dizına yükanı
42 “Ey Aba,
Sen etqusı gelse bu biyzını Menden bur ahbarduğu yuu.
Ese Miniği gövnüme ireqımıda,
İzıñniği gövnüñe bur iriduğu” ede dovu qılcı.
43 Asmandan melyayike bur Aysoğa göranı,
Aña küş verci.
44 Ayso acısı işinde volı,
yoho cıxıñlığına dovu qılcı.
Andan der qan damqan kema yere damcı.
45 Ayso dovu qıl volqalı xotı muritlarıniği yanına gelse,
ularniği düğ uxu uxlığanını görci.
46 İnci U ulıra “Seler nehme uxlabur ri?
Xotda dovu qıl,
edemese seler çüseğe çüşqular” edici.
Aysonı çutqanı
47 Ayso dağı yenşabur ma,
kişxobanor gelci.
Onişgilerden burı adını Yuda çıxrağucı ilinde ularnı başlıba.
U Aysonı mödiğür ede Aniği yanına yaxılıgelci.
48 Ayso aña “Eş Yuda,
sen Adam Oğlını bur mödiğanıla chumay etbur ru?”
ede sorcı.
49 Aysoniği tönen-qırğındağılar nañ iş çıxqanını görğende,
Aña “Ya Rab,
ipsem qılışla çatqu mu?”
ede sorcı.
50 Ulardan burı baş ruhaniniği yoğcısını çatı,
aniği sıx qulağını cadacı.
51 Ese Ayso “Durduğu,
inci beli etme!”
edici.
U ilıla yoğcıçüxniği qulağına diği,
anı ornına endirci.
52 Ayso İzını çutma gelğen ulı ruhanilere,
eybadet-sarını sıxlağucılarniği dambasılıra ma xarısılıra “Çixcinnı çutma gelğen kema,
seler qılış ma boñboñla Minı çutma geldu?
53 Men her gün eybadet-sarıda selerla burlığı volğanda,
seler Maña elor qoymacı.
Ese inci selerniği zamanıñdır,
qarıñqulux höküm sürğüsı zamandır” edici.
Petrus Aysonı danımas ede chınrın etmeğanı
54 Ular Aysonı çutqalı,
Anı baş ruhaniniği öyüne başlıbarcı.
Petrus ularniği ardına yıraçüx ireşci.
55 Ular ayıtniği ortasında ot qalı,
bur yüründe zoğzacı.
Petrus hem ularniği arasında oturcı.
56 Bur yoğmu'or ot qırğında oturğan Petrusnı görci.
U aña qadanı öşarı “Bu kişçüx hem Ala volğuca” edici.
57 Ese Petrus “Eş yengu,
men Anı danımas” ede başa almacı.
58 Bohorda başqı kişor anı görü “Sen hem ulardan burı ira” edici.
Ese Petrus “Eş ağinim,
men emesdır” edici.
59 Bur saat kemasor ötbarqalı,
nene bur kişor onami “Bu kişçüx hem shıxoçüx Ala volğuca,
neğe dese bu hem Celile kişa” edici.
60 Ese Petrus “Eş ağinim,
men siniği nañ yenşığanıñnı biluxdır” edici.
U da yenşabur ma,
tux mañracı.
61 Rab çürengilı Petrusa öşürci.
U vaxda Petrus izığa Rab “Buğün tux mañrığandan ili,
sen Minı danımas ede üsh gez chınrın etmes” ede yenşığan gahcası gövnüne çüşgelci.
62 İnci Petrus daşına çıxbarı acılığına yağlacı.
Aysonı deyğanı ma yıxuy iline ahbığanı
63 Aysonı sıxlağucılar Anı kemencılı deyci.
64 Ular Aniği gözlarını kible Aña “Sen bur yüyen et!
Sinı deyğüci kem ira ra?”
ede sorcı.
65 Ular dağı başqı gahcı yarağor yenşı,
Anı küli vuru etci.
66 Tañıtqalı xalqıniği xarısıları,
ulı ruhaniler ma qanun-tişlengucılar yığınaşı,
Aysonı izlerniği xuy aşqan yürüne başlıbarcı.
67 Ular Aña “Sen Mesih volsa,
ipsere yenşıdıver” edici.
Ayso ulıra “Men selere yenşıbiquse da,
seler yılımas.
68 Men selere sorsa,
seler Maña lan vermes.
69 Ese mundan ardı Adam Oğlı Küş-Volğan Xudaniği sıx yanında oturar” edici.
70 Ular yogosı “Sen ene Xudaniği Oğlıdır mi?”
ede sorcı.
Ayso ulıra “Men U eğanımnı seler iñsılar yenşabur” edici.
71 İnci ular “İlere neğe şahitlix dağı da artuğunda keliğür ri?
İler munı U İzıniği ağzından iştici” edici.