Ayso Pilatusniği ilinde
23
Anda yığınqucılar yogosı xotı,
Aysonı Pilatusniği yanına başlıbarcı.
2 Ular Aysonı çöxüş itı “Piser bu kişçüx ilerniği milletnı mehgir yola başlığanını görci.
U da kaysağa shuy verdirmur,
İzını dağı Mesih,
xoñshoñ ede çıxrıba” edici.
3 Pilatus Aña “Sen Yehudilerniği xoñshoñıdır mi?”
ede sorcı.
Ayso aña “Sen yenşığan kemadır” ede cavap verci.
4 Pilatus ulı ruhanilere ma kişxobana “Men bu kişçüxde çöxüş etgusı heşbeşor datmur” edici.
5 Ese ular onami “Bu kişçüx Celileden başlı muña yetgunçüx,
püştün Yehudaya zimende örğatı xalqını lollandırba” edici.
Ayso Herodesniği ilinde
6 Pilatus munı işteğende Aysonı Celile kişa ru ede sorcı.
7 Ayso Herodesniği höküm sürğen zimendiği volğanını Pilatus bilğende,
Anı şu vaxda Yerusalimde volğan Herodesniği yanına yüreci.
8 Herodes Aysonı görğende cıxıñ galacı,
neğe dese u Anı qahalordan görqusı gimiş.
U Aysonı añnı,
izı Aysoniği alyamet etganını bur görse ede ümit dartmış.
9 Herodes Aña yarağor soruş sorcı,
Ayso ese aña heşbeşor lan vermacı.
10 Ulı ruhaniler ma qanun-tişlengucılar xotqalı,
Aysonı ağırlığına çöxci.
11 Herodes izıniği shıbinlarıla Aysonı görenmi kemencılacı.
Ular Aña görüngen don bur giydarı,
Anı Pilatusniği yanına yandıryüreci.
12 Andan ili Pilatus ma Herodes işgisı düşmen volmış,
ese u güne u işgisı bur-burıla yarıbacı voluşcı.
Aysoğa hukun çıxırğanı
13 Pilatus ulı ruhanilernı,
beğlernı ma xalqını yığı,
14 ulıra vaxı “Seler xalqını mehgir yola başlıba ede,
bu Kişçüxnı miniği yanıma başlıgimiş.
Öşür,
men selerniği iliñde Aña soval sorcıçı,
seler Anı çöxgen çöxüşlerden men bur da datmacı.
15 Herodes hem heşbeşor datmi Anı ilere yandıryüremiş.
Öşür,
U ülüme babılığan iş heşbeşor etmamış.
16 Eli etgenniği men Anı deyğide yürequğu” edici.a
18 Püştün xalqı burlığı “Bu Kişçüxnı yoxqan etduğu,
pisere Barabanı yü#05825fuğu!”
ede zıqıracı.
19 Barabanı şeherde bur gez lollanqan ma kiş üldürğen sebepden banfaña bexlimiş.
20 Pilatus Aysonı yürequsı gilı,
nene ulıra yenşacı.
21 Ese ular “Anı shızıcağa qadı,
shızıcağa qadı!”
ede zıqıracı.
22 Pilatus üçünci gez ulıra “Neğe yi?
Bu Kişçüx nañ yemen iş etmiş şi?
Men Anda ülüm ceza babılaqusı bur da datmacı;
eli etgenniği men Anı deyğide yürequğu” edici.
23 Ese ular Anı shızıcağa qadı ede dadıx ünüla onami kelici,
ularniği ününı hem basınmacı.
24 İnci Pilatus ularniği kelişine ire hukun çıxırcı.
25 Ular keleğen kişçüxnı — lollanqan ma kiş üldürğen sebepden banfaña bexlengen kişçüxnı yüreci,
Aysonı ese ularniği gövnüne usı colıberci.
Aysonı shızıcağa qadığanı
26 Ular Aysonı ahbığanda,
ağıldan gelğen Simun diğen Kürenay kişornı çutı,
shızıcaçüxnı aniği iştına qoybirı kötürqalı,
anı Aysoniği ardına ireşdirci.
27 Aysoniği ardına bur limañ kişxobanor ireşci,
ularniği arasında Aysoğa vulı yas etgen ma yağlığan qadınkişler hem volcı.
28 Ayso ulıra çürenqalı beli edici:
“Ey Yerusalim qızları,
Maña vulı yağlıma.
Seler izıñlıra ma balılarıña vulı yağlı.
29 Belisgi günler gibur,
u günlerde kişler ‘Ganbı qadınkişler,
doğmığan xosaxlar ma emdirmeğen emçüxler bur bextli'a ra!’
eder.
30 U vaxda ular dağlıra ‘İpsem iştıma bur yıxılduğu!’
eder,
tegirlere ‘İpsemnı bur gömduğu!’
eder.
31 Ular dal göx vaxında bularnı etse,
qurğan vaxında nañ etmeğa ri?”
32 Fanrın işginı hem Aysola burlığı üldürme ahbarcı.
33 Ular Baş Sınix diğen yürüne gelğende,
Aysonı ma u fanrınçüx işgisını anda shızıcağa qadacı,
burını Aysoniği sıx yanında,
nene burını yolax yanında.
34 Ayso “Aba!
Ular izler nañ etganını bilmeğenniği,
ularnı bur afu etduğu” edici.
Shıbinler can çöyü,
Aniği biqırağını ülüşci.
35 Xalqı tixinqalı tamaş vaxcı,
beğler Anı külü “U başqı kişlernı cuulamış;
U Xudaniği Mesihi — Xudaniği Dañnığanı volsa,
İzını hem bur cuulağı yi!”
edici.
36 Shıbinler hem Aniği yanına gilı Anı kemencılacı.
Ular Aña lasu virı
37 “Sen Yehudilerniği xoñshoñı volsa,
İzıñnı hem bur cuulı yi!”
edici.
38 Aniği iştı samında “BU YEHUDİLERNİĞİ XOÑSHOÑIDIR” diğen piştix bur vara.
39 Anda shızıcağa qadalğan fanrınçüxlerden burı “Sen Mesih emesdır mi?
Sen İzıñnı ma ipsemnı bur cuulı yi!”
ede,
Anı küli vuru etci.
40 Nene bursı fanrınçüx anı öhreqalı “Sen Xudadan xorğamur ru?
Sen hem Aniği kema ceza cüyünde var.
41 İxilyoğa ilerniği etganına ire ceza değgenniği,
ilerniği ceza gundañdır,
bu kişçüx ese emesgen iş heşbeşor etmamış” edici.
42 İnci u “Ey Ayso,
Sen İzıñniği Vañgoña girğende minı bur giladuğu yuu!”
edici.
43 Ayso aña “Men shıxoçüx saña yenşağı:
buğün sen Mila cennetde volar” edici.
Aysoniği ülümü
44 Öyle vaxında püştün zimen iştında qarıñqu volı,
üçünci saata yetgunçüx qarıñqu volcı.
45 Güneş hem yoxqan volcı;
eybadet-sarıdağı manzı qoşa varcı.
46 Ayso xıddı ünüla “Ey Aba,
Men ruxumnı Siniği ilıña colıbibur” ede zıqıracı.
Munı edeqalı Aniği soluğu üzülci.
47 Yüzbaşı bu çıxqan işlernı görqalı “Bu Kişçüx shıxoçüx doğrı kişor ira!”
ede Xudağa şerifu etci.
48 Munı tamaş vaxqına vulı yığıngiğücor bu çıxqan işlernı görqalı,
izlerniği köxriğinı chula-chula yanbarcı.
49 Aysonı danığan heme kişler ma Aniği ardına Celileden ireşgelğen qadınkişler yıraçüx tixinaşı,
çıxqan işlernı öşürci.
Aysonı gömganı
50 Yıxuyniğilerden burı adını Yusufu çıxrığan yaxşı ma doğrı kişor volcı.
51 U Yehudayadağı Arimatiya şeherden giğücidır,
Xudaniği Vañgosına hem güyüğücidır;
u Yıxuyniği gohbasına ma itişine onımacı.
52 U Pilatusniği yanına varı,
Aysoniği miyitını kelici.
53 İnci u Aysoniği miyitını endirgilı,
mişax gemder bözla yörğe bağlı,
qayıda oñurlığan tebetor işinde qoycı;
u tebetçüxniği işinde bur kişniği sıniğinı da qoyğan yoxua.
54 U gün belen etgen gündır,
Şabat gün başlanqına yaxılacı.
55 Aysoğa iraşı Celileden gelğen qadınkişçüxler Yusufuniği ardına ireşbarı,
tebetçüxnı ma Aniği miyitını niçix yatırğanını görci.
56 İnci ular yanbarı,
miyite qoyğına datli isgengusı ma yarmaxli yağ belen etci.
Şabat güne ular Xudaniği emrine ire xollancı.