Aysoniği dirilğanı
24
Bur zhumaniği burıncı güne moxlañ erçüx,
qadınkişçüxler izler belen etgen datli isgengusılarnı çutı,
tebetçüxniği yanına gelci.
2 Ular öşürse,
tebetçüxniği ağzından daşını gülündürmiş.
3 İnci ular işine girbarsa,
Rab Aysoniği miyitını datmacı.
4 Ular cañ munı sumurlı ornaşdırınmığanda,
yıldırlı lem-lem etgen biqırıx giyğen kiş işgi ularniği yanında tixinci.
5 İnci qadınkişçüxler xorğı,
yüzünı yere yaxı yükünci.
U kişçüx işgisı ulıra “Seler neğe dirinı ülüler arasında işdibur ri?
6-7 U munda yoxdır,
U dirilci.
U ‘Adam Oğlını gunıhacılarniği ilına colıbiğü,
shızıcağa qadağu ma üçünci güne dirilğü keler’ ede,
İzı Celilede volğandox selere niçix yenşıberğanını giladuğu” edici.
8 U vaxda Aysoniği gahcası qadınkişçüxlerniği gövnüne çüşgelci.
9 Qadınkişçüxler tebetçüxden yangilı,
bu heme işlernı on bur resula ma başqı kişlere mana yenşıberci.
10 Resullıra bu işlernı yenşıbiğüci Mağdaladağı Merem,
dağı Yoxanna,
Yaqubiniği aması Merem ma ularla burlığı volğan başqı qadınkişler idır.
11 Ese bu gahcılar resullıra qarışli-qurışli görünci,
ular qadınkişçüxlernı yılımacı.
12 Petrus ese xotı tebetçüxe yügürbarcı.
U ömüxlyanı işine öşürse,
mişax gemder bözçüxnı görci.
Bu çıxqan iş aña heyran volı,
u andan yangelci.
Ayso Emmavus yolda görünganı
13 U güne muritlerden işgi kiş Emmavus diğen ağılora varba.
Şu ağılçüx Yerusalimden yırıxlığına yiğirmi beş li kemasor var.
14 Ular bu çıxqan heme işlernı izler arasında yenşışcı.
15 Ular yenşaşı gepleşgende,
Ayso İzı ularniği yanına gilı,
ularla burlığı yolda yürci.
16 Ese Anı danımağı ede ularniği gözları kiblenmiş.
17 Ayso ulıra “Seler yolda yüre-yüre bur-burıñla nañ yenşışbur ri?”
ede sorcı.
Ular giñnanı yürmi durcı.
18 Ulardan burı Kleyopa çıxrağucı Aña “Yerusalimde qonax volı,
bu günlerde anda çıxqan işlernı bilmiğüci sen bur kişçüxa mi?”
ede lan verci.
19 Ayso ulıra “Nañ iş yi?”
ede sorcı.
Ular Aña beli cavap verci:
“Nasıra kiş Aysoniği işları.
U kişçüx Xudaniği ma püştün xalqıniği ilinde gahcıda ma emelde qudret volğan peyğemberordır.
20 Piserniği ulı ruhaniler ma beğler Anı ülüme höküm etgine vulı colıbirı,
shızıcağa qadacı.
21 Piser ese İsra'ilnı cuushu etgucı U bur volsa ede ümit dartcı.
Andan daşı da,
bu işler çıxqalı buğüngila üsh gün volcı.
22 Dağı da ipsemniği arasımdağı qadınkişlerden burisı ipsemnı şıçalandırcı.
Ular böxde erçüx tebete varsa,
23 Aniği miyitını datmamış.
Ular ipsemniği yanıma yangilı,
izlere melyayikeler göranı Aysoniği dirilğanını yenşıberğanını ipseme yenşıbirır.
24 İpsemla burlığı volğucılardan burisı hem tebete varı,
heme iş qadınkişçüxler yenşıberğen kemaçüx volğanını görmiş,
ese Aysonı görmimiş.”
25 İnci Ayso ulıra “Ey aqıl yoxqanlar!
Peyğemberler yenşığanornı seler yiriğiñde yılısa bur assona ra!
26 Mesih bu azaplarnı görü,
İzıniği şerifusına girğü kelemadu?”
edici.
27 İnci U Moso ma heme peyğemberlerden başlı,
heme Muqaddes Piştixlerde İzını pişteğen işlernı ulıra yenşıbirı bildirci.
28 Ular varğan ağılçüxe yetbığanda,
Ayso dağı da yırıx yola varğan kema yürci.
29 Ese ular Anı kañ itı “Geş volgilı gün batbarcı ma,
ipsemla burlığı oturduğu ya” edici.
İnci Ayso ularla burlığı oturğına vulı işine girbarcı.
30 Ayso ularla burlığı şırı qırğında oturğanda,
U emex alı shükür dovu itı,
anı kitqalı ulıra verci.
31 Şu vaxda ularniği gözları açalı,
Aysonı danacı.
Ese Ayso ularniği ilinden yoxqan volcı.
32 Ular bur-burlarına “U yolda ilerla gepleşgende ma Muqaddes Piştixlernı ilere yenşıbirı bildirğende,
ilerniği işinde yirixler köyüşmadu?”
edeşci.
33 Ular u vaxda xotı Yerusalime yanbarcı.
Ular anda yığınışqan on bur resulnı ma yanındağılarnı görci.
34 Ular “Rab shıxoçüx dirilmiş,
dağı Simuna görünmiş” edici.
35 İnci u işgisı yoldağı işlernı ma Ayso emex kitgende İzını niçix ulıra danındırğanını yenşıberci.
Ayso muritlarına görünganı
36 Ular cañ bu işlernı yenşışqanda,
Ayso İzı ularniği arasında tixanı ulıra “Selere salim volğı!”
edici.
37 Ular ruxu'or görmiş ede,
cünkün yıllanı xorğacı.
38 Ayso ulıra “Seler neğe dara yıllınbur ri?
Selerniği gövnüñde neğe yınsın etbur ri?
39 Seler Miniği ellarımnı ma ayaxlarımnı bur vax.
Bu Men İzım idır.
Seler Maña değde bur vax.
Seler görğen kema,
Maña et ma sınix var,
ese ruxuğa yoxdır” edici.
40 U munı yenşıqalı,
ulıra İzıniği ellarını ma ayaxlarını görğesberci.
41 Ular söyanı heyran volı yılınmığanda,
Ayso ulıra “Munda selere yiğüsı var mu?”
ede sorcı.
42 Ular Aña gorlatqan balux bur tige verci.
43 Ayso anı alı,
ularniği gözü ilinde yici.
44 Ayso ulıra “Men selerla burlığı volğanda selere yenşıberğen gahcım bulardır:
Mosoniği Qanunında,a
Peyğemberlerniği Kitaplarında ma Zeburda Minı pişteğen heme işler çıxqu keler” edici.
45 İnci ular Muqaddes Piştixlernı olanqına vulı,
Ayso ularniği sumurlaşını aşcı.
46 U da ulıra beli edici:
“Beliği piştibur:
Mesih azap görü,
üçünci güne ülüler arasından diriler.
47 Yerusalimden başlı heme milletlere gunıhalarını afu etgine vulı töbe etgusını Aniği adıla vası eter.
48 Seler bu işlerniği şahitlarıdır.
49 Bey,
Men Abımniği gahcı verğanını selere dohulıyüreğür,
seler dese orxadan engelğen qudretla bolanqançüxor bu şeherde oturdığı.”
Aysonı asmana ahbığanı
50 Ayso ularnı şeherden daşına — Betaniyağa yetgunçüx başlıbarcı.
İnci U ellarını tixi ulıra yaxşı-niyit qılberci.
51 Ulıra yaxşı-niyit qılberğende Ayso ulardan garlanbarı,
Anı asmana ahbarcı.
52 Muritları Aysoğa secide itı,
ulı söyünçla Yerusalime yanbarcı.
53 Ular geşgünçüx eybadet-sarıda volı,
Xudağa halqış etci.