Bovaz Rutnı alğanı
4
Bovaz chınmına çıxgilı anda oturcı.
U vaxda Bovaz yenşığan u cuushu etgusı qañ volğan ağiniçüx andan ötbarba.
Bovaz u kişçüxe “Ey,
ağinim,
muña gelde bur zoğzı” edici.
U aña gilı zoğzacı.
2 İnci Bovaz şeherdiği xarısılardan on kişnı çalıbarı “Seler hem muña bur zoğzı” edici.
Ular hem aña zoğzacı.
3 Bovaz u cuushu etgusı qañ volğan ağiniçüxe vaxı “Moğab zimenden yanqan Nağomi,
ilerniği ağini Elimelexniği astını satba.
4 Men bu işçüxnı saña bur bildirği dibur,
sen hem munda oturğucılarniği ilinde ma xalqımniği xarısılarıniği ilinde u astnı al.
Sen u astnı cuushu etgur dese,
cuushu et.
Sen cuushu etmes dese,
maña bur yenşı,
men hem bur bilği.
Senden daşı anı cuushu etgusı qañ volğan kişor yoxdır,
senden ardı men idır” edici.
U kişçüx “Men cuushu etgur” edici.
5 Bovaz “Sen Nağomiden astını alğan güne,
vañrınniği adı izıniği ısgısında qalğına vulı,
sen vañrınniği kinı Moğab qadınkiş Rutnı hem alğu keler” edici.
6 U cuushu etgusı qañ volğan ağiniçüx “Men anı cuushu etinmeğa,
men anı cuushu etse izımniği ısgımnı dağıtquğa.
Men cuushu etinmeğenniği,
miniği cuushu etgusımnı sen izıña cuushu etduğu” edici.
7 Qedim vaxda İsra'ilde cuushu etgende ma satıx itişgende,
her işnı bura qoyğanda,
bur kiş xayını çöyü nene bursı yañqı kişe viba;
bu dese İsra'ilde çañnığan satıxnı delil etgen yoldır.
8 U yaxın ağiniçüx Bovaza “Sen izıñ alduğu” edici.
İnci u da xayını çöyberci.
9 Bovaz xarısılıra ma heme kişlere “Seler buğün şahitdır.
Elimelexniği heme vocanlarını,
hem da Kilyonniği ma Maxlonniği heme vocanlarını men Nağomiden alcı.
10 Vañrınniği adı izıniği ısgısında qalğına vulı,
dağı vañrınniği adı izıniği ağiniları ma şehirındağı kişlerniği arasından yoxqan volmığına vulı,
Maxlonniği gohosı Moğab qadınkiş Rutnı men kin albur.
Seler buğün şahitdır” edici.
11 Chınmında volğan heme kişler ma xarısılar “Piser şahitdır.
RAB siniği zahsañıña gelğen bu qadınkişnı İsra'il zahsañını qurğan qadınkiş Raxel ma Leya işgisı kema voldurğı.
Efratada sinı ulğatqı,
Betlehemde saña qulaxor tixgi.
12 RAB bu kiçi yaş qadınkişden saña verğen xuurından,
siniği zahsañıñnı Tamar Yehudağa doğberğen Peresniği zahsañı kema voldurğı” edici.
13 Bovaz Rutnı alcı,
Rut aniği kinı volcı,
Bovaz aniği yanına girci.
RABniği iş köyğanıla Rut xosağına kötü oğıl bur doğcı.
14 Qadınkişler Nağomiğe “RABğe halqış volğı!
Buğün RAB saña cuushu etgusı qañ volğan ağini yoxqan voldurmacı.
Bu balaçüx İsra'ilde qulaxor tixer.
15 Saña açışqan ma yıdı oğıldan dağı yaxşı volğan oğlan-kinıñ anı saña doğberğenniği,
u balaçüx siniği canıñnı yañılandırqucı ma sen xarığan vaxda sinı asırağucı volar” edici.
16 Nağomi balaçüxnı alı qoynuna xuçıxlacı,
u da aniği sosın etgucı volcı.
17 Hamzayı qadınkişler “Nağomiğe oğıl bur doğbimiş” ede balaçüxe ad qoşcı.
Ular aniği adını Ovet qoşcı.
Ovet Yişayniği abasıdır,
Yişay Davudiniği abasıdır.
18 Peresniği xuurınları bulardır:
Peresden Xesron çıxcı,
19 Xesrondan Ram çıxcı,
Ramdan Aminadab çıxcı,
20 Aminadabdan Naxşon çıxcı,
Naxşondan Salmon çıxcı,
21 Salmondan Bovaz çıxcı,
Bovazdan Ovet çıxcı,
22 Ovetden Yişay çıxcı,
Yişaydan Davudi çıxcı.