Yaxıyı Rabniği yolını belen etganı
3
Tiberiyus kaysa höküm sürğen vaxdağı on beşinci yıla,
Ponti Pilatus Yehudaya zimende zundu oturba,
Herodes Celile zimende xan oturba,
aniği inisı Filipus dese İtureya ma Teraxoni zimende xan oturba,
Lisaniyas dese Abilene zimende xan oturba.
2 Xanan ma Kayafas işgisı baş ruhanidır.
U vaxda Xudaniği gahcası gañtañda Zekeriyaniği oğlı Yaxıyığa engelci.
3 U Yordan mören sarındağı püştün zimene gilı,
kişlere izlerniği gunıhalarını afu etgine vulı töbe itı,
arışsu alğusını vası etci.
4 Yeşaya peyğemberniği kitabında bu işnı beli piştibur:
“Gañtañda zıqırağucı ününı çıxarı
‘Seler Rabniği yolını belen et,
Aniği yürğüsı yolını düzet.
5 Heme qolnı doldurar,
Heme dağ ma tegirnı piñlendirer,
Eğir yollarnı düzeter,
Tönpüxli yollarnı yılbılandırar.
6 Heme kişler Xudaniği dacuu etganını görer’ ede qiyrıba.”
7 Yaxıyı izıdan arışsu alma gelğen kişxobanlıra beli edici:
“Ey ağu yılın balasılar!
Gelğen qazapdan qaşqusını kem selere görğesbirır ri?
8 Töbeğe yarışqan yimiş dur.
İzıñlar gövnüñde ‘İlerniği ata-babı İbrahimidır’ edeme.
Men selere yenşağı:
Xuda bu daşlardan da İbrahimiğe xuurın xotturgelse volar.
9 Paldanı kozañ dallarniği öziğine qoycı,
yaxşı yimiş durmığan her dalnı kisqalı ota cağabur.”
10 Kişxobanlar aña “Ene piser nañ etgo?”
ede sorcı.
11 Yaxıyı ulıra “Xantır işgi volğucı burını xantır yoxmağucığa ver,
lemi volğucı hem eliği et” ede cavap verci.
12 Shuy yığqucılar hem arışsu alma gilı aña “Mutalim,
piser nañ etgo?”
ede sorcı.
13 Yaxıyı ulıra “Dıñnığanından seler artuğunda yığma” edici.
14 Shıbinler hem aña “Ene ipsem nañ etgo?”
ede sorcı.
U ulıra “Kem volsıdan zalim shıllı ma yalğan şahitlix itı helli xeyderme;
seler cıñnığanıña beğen” edici.
15 Xalqı ümit dartı,
yogosı izlerniği yiriğinde Yaxıyını Mesih volsa choñ ede sumurlacı.
16 Yaxıyı ular yogosına “Men selere sula arışsu albibur,
ese maña vaxqan da küş Volğucı gibur,
men Aniği xaybağını tişberğine da piylımığa.
U selere Muqaddes Ruxula ma otla arışsu alberer.
17 Aniği küriği ilında var,
U yüdanını sorı aratı,
boğdını qazınağına yığar;
dovunnı ese senmeğen otda yandırar” ede cavap verci.
18 Yaxıyı dağı başqı yarağor çölleğen gahcıla xalqığa yaxşı xebernı vası etci.
19 Ese Herodes xan iz inisıniği kinı Herodiyanı alğan sebebinden ma iz etgen heme yemen işlerniği sebebinden,
Yaxıyıniği xaçısını yici.
20 Herodes iz etgen heme yemen işlerden daşı da Yaxıyını banfaña bexlici.
Ayso arışsu alğanı
21 Xalqı man arışsu alğanda,
Ayso hem arışsu alcı.
U dovu qılğanda,
asman gilanı,
22 Muqaddes Ruxu gürğünçüx suret kema Aniği iştına engelci.
Asmandan “Sen Miniği açışqan Oğlımdır,
Senden Men beğenbur” diğen ünor çıxgelci.
Aysoniği cudını gilığanı
23 Ayso İzı fushı etme başlığanda otus yaş kemasor volcı.
Kişlere dese,
U Yusufuniği oğlıdır.
Yusufu Eliniği oğlı,
24 Eli Mattatniği oğlı,
Mattat Leviniği oğlı,
Levi Malkiniği oğlı,
Malki Yanayniği oğlı,
Yanay Yusufuniği oğlı,
25 Yusufu Mattityaniği oğlı,
Mattitya Amosniği oğlı,
Amos Nahumniği oğlı,
Nahum Hesliniği oğlı,
Hesli Nagayniği oğlı,
26 Nagay Mahatniği oğlı,
Mahat Mattatyaniği oğlı,
Mattatya Şiminiği oğlı,
Şimi Yosaxniği oğlı,
Yosax Yodaniği oğlı,
27 Yoda Yoxananniği oğlı,
Yoxanan Reşaniği oğlı,
Reşa Zerubabilniği oğlı,
Zerubabil Şeyaltiyelniği oğlı,
Şeyaltiyel Neriniği oğlı,
28 Neri Malkiniği oğlı,
Malki Addiniği oğlı,
Addi Kosamniği oğlı,
Kosam Elmadamniği oğlı,
Elmadam Erniği oğlı,
29 Er Yeşuvaniği oğlı,
Yeşuva Eliyezerniği oğlı,
Eliyezer Yorimniği oğlı,
Yorim Mattatniği oğlı,
Mattat Leviniği oğlı,
30 Levi Şimonniği oğlı,
Şimon Yehudaniği oğlı,
Yehuda Yusufuniği oğlı,
Yusufu Yonamniği oğlı,
Yonam Elyakimniği oğlı,
31 Elyakim Meleyaniği oğlı,
Meleya Mennaniği oğlı,
Menna Mattataniği oğlı,
Mattata Natanniği oğlı,
Natan Davudiniği oğlı,
32 Davudi Yişayniği oğlı,
Yişay Ovetniği oğlı,
Ovet Bovazniği oğlı,
Bovaz Salmonniği oğlı,
Salmon Naxşonniği oğlı,
33 Naxşon Aminadabniği oğlı,
Aminadab Adminniği oğlı,
Admin Arniniği oğlı,
Arni Xesronniği oğlı,
Xesron Peresniği oğlı,
Peres Yehudaniği oğlı,
34 Yehuda Yaqubiniği oğlı,
Yaqubi Issaqıniği oğlı,
Issaqı İbrahiminiği oğlı,
İbrahimi Teraxniği oğlı,
Terax Naxorniği oğlı,
35 Naxor Seruğniği oğlı,
Seruğ Revuniği oğlı,
Revu Peleğniği oğlı,
Peleğ Everniği oğlı,
Ever Şelaxniği oğlı,
36 Şelax Kenanniği oğlı,
Kenan Arpaxşatniği oğlı,
Arpaxşat Samniği oğlı,
Sam Nohyıniği oğlı,
Nohyı Lemexniği oğlı,
37 Lemex Metuşelaxniği oğlı,
Metuşelax Xanoxniği oğlı,
Xanox Yeretniği oğlı,
Yeret Mahalalelniği oğlı,
Mahalalel Qenanniği oğlı,
38 Qenan Enoşniği oğlı,
Enoş Şesniği oğlı,
Şes Adanniği oğlı,
Adan Xudaniği oğlıdır.