Yüzbaşıniği imanı
7
Ayso xalqıniği ilinde bu gahcı yogosını yenşı volqalı Kapernahuma varcı.
2 Anda yüzbaşı burniği ulı etgen carıxcısı ağarı ülğü kema volcı.
3 Bu yüzbaşıçüx Aysonı añnıqalı,
Ayso bur gilı izıniği carıxcısını bur voldurğı ede,
Yehudilerniği xarısından bicinı Aysoniği yanına dohulıyüreci.
4-5 Ular Aysoniği yanına gilı,
Aña yirixları cüyünden yaralı “Bu kişçüx ilerniği millete açışqanniği ma u ipsere eybadet-öy örtberğenniği,
Sen munı etbiğüsı aña babılabur” edici.
6 Ayso ularla burlığı varcı.
U yüzbaşıçüxniği öyüne yaxılıbığanda,
yüzbaşıçüx izıniği dosdanlarını Aysoğa bu gahcılarnı yenşıma dohulıyüreci:
“Ey Rab,
İzıñnı bur molandırqıma.
Sen miniği öyüme girgelğine men piyla'uxua.
7 Bu sebepden men vaxsa,
sinı görme giğüsına hem men piyla'uxua dibur.
Sen gahcı bur yenşıça,
miniği carıxcım ornı ener.
8 Men izım hem kişniği qañı cüyünde volğan kişordır,
miniği cüyümde hem shıbin var.
Men bu burına ‘Var’ dese,
u varar;
u burına ‘Gel’ dese,
u geler.
Men carıxcıma ‘Munı et’ dese,
u anı eter.”
9 Munı işteğende Aysoğa heyran volcı.
İnci Ayso İz ardına ireşgen kişxobana çüranı “Men selere yenşağı:
İsra'il kişlerniği arasında da Men belisgi ulı iman görmacı” edici.
10 Yüzbaşı dohulıyüreğen kişçüxler öyçüxe yanbarsa,
u carıxcıçüx sıxçüx volmış.
Ayso gohorniği oğlını dirildirğanı
11 Andan ardı Ayso Nayin çıxrığan şeherora varcı.
Aniği muritları ma limañ kişxobanor Ala burlığı varcı.
12 Ayso chınmın yanına yetbığanda,
goho icorniği burçüx oğlı ülmişde,
aniği miyitını damnı çıxırgiba.
Şeherdiği xalqıdan yarağor kiş hem u gohoçüxniği yanında vara.
13 Rab gohoçüxnı görğende aña iş köyci.
U aña “Yağlıma!”
edici.
14 İnci U varı zhınazığa değci,
anı damnağucılar hem durcı.
Ayso “Ey yiğit,
men saña ‘xot!’
ede yenşabur” edici.
15 İnci u vañrınçüx xotgilı gahcı yenşacı.
Ayso anı icasına colıberci.
16 Andağı yogosılar cıxıñ xorğacı,
dağı da Xudağa şerifu itı “İlerniği arasıñda ulı peyğemberor çıxmış!
Xuda İzıniği xalqısına rehmet görğesmiş” edici.
17 Aysonı yenşışqan bu xeberçüx püştün Yehudayağa ma u tönen-qırğındağı heme zimene yazılcı.
Ayso Mesih ma Yaxıyı Arışsucı
18 Yaxıyıniği muritları bu heme işlernı Yaxıyığa yenşıberci.
İnci u muritlarından işgi kişnı iz yanına çıxrı,
19 ularnı Rabğe “Sen u Giğüci idır mu piser başqı kişe güyüğü yi?”
ede añnaşma yüreci.
20 Ular Aysoniği yanına gilı “Yaxıyı Arışsucı ipsemnı Siniği yanıña ‘Sen u Giğüci idır mu piser başqasına güyüğü yi?’
ede añnaşma yürır” edici.
21 Cañ u vaxda Ayso yarağor ağrıxcılarnı,
vınyıa değgucılarnı ma arı-emesganı ağırğan kişlernı voldurbur,
dağı yarağor qorılarniği gözlarını hem gördürbur.
22 Ayso ulıra “Varda,
seler görğanıñnı ma işteğanıñnı Yaxıyığa yenşıdıver:
qorılar görba,
axsaxlar yürba,
mafınbin değgucılar arılba,
sağırlar işteba,
ülüler dirilba,
dağı yox kişlere Yaxşı Xebernı vası etbiba.
23 Miniği sebebimden gülünmiğüci bextlidır” ede cavap verci.
24 Yaxıyıniği xeberciları varqalı,
Ayso kişxobanlıra Yaxıyını beliği yenşıma başlacı:
“Seler gañtaña nañ öşürme varcı?
Yel yıxılandırğan qamuşçöpnı öşürme vardu?
25 Ene seler nañ öşürme varcı?
Yaxşı biqırıx giyğen kişornı öşürme vardu?
Öşür,
görüngen biqırıx giyğüciler ma barlıx işinde oturğucılar xoñshoñniği sarısında var.
26 Ene seler nañ öşürme varcı?
Peyğemberornı mi?
İdır,
Men selere yenşağı:
u peyğemberden da ulıdır.
27 “ ‘Öşür,
Men xebercimnı Siniği iliñe dohulıyürebur;
U Siniği iliñde yolıñnı belen eter’
ede pişteğanı bu kişçüxnı yenşabur.
28 Men selere yenşağı:
qadınkişden doğulğan kişlerniği arasında Yaxıyıdan ulısı yoxdır;
ese Xudaniği Vañgosında kiçicüğü da andan ulıdır.”
29 Yaxıyı arışsu alberğen heme kişler ma shuy yığqucılar munı işteğende Xudaniği adil volğanını delil etci.
30 Ese Fariseyler ma qanuncılar Yaxıyıdan arışsu almacı,
ular Xudaniği izlere volğan niyitnı zelemacı.
31 Ayso nene beli edici:
“Eli etgenniği Men bu goñyındağı kişlernı naña bilağo?
Ular naña oxşıba ra?
32 Ular cıshıda zoğzı
‘Piser selere çör fürberse,
seler oyun oynamur,
Piser yas etse,
seler yağlamur’
ede bur-burına zıqırığan balılar kema.
33 Yaxıyı Arışsucı gilı emex yimese,
puto sormu işmese,
seler ‘Anı pirı çutmış’ edir.
34 Adam Oğlı gilı işse,
yise,
seler ‘Bu Kişçüx damaxsın ma sormukeya,
shuy yığqucılarniği ma gunıhacılarniği dosdana’ edir.
35 Ese aqılnı izıniği heme aqıl volğan kişları delil etbur.”
Ayso gunıhacı qadınkişornı afu etganı
36 Fariseylerden burı Aysola lemi bur işgi ede,
Anı çıxracı.
Ayso Fariseyçüxniği öyüne girı,
şırı qırğına oturcı.
37 U şeherçüxde gunıhacı qadınkişor volcı.
Fariseyçüxniği öyünde Ayso lemi işganını u bilğende,
datli isgengen yağ bur yüshı loñxor çutgilı,
38 Aysoniği ardında,
ayaxlarıniği yanında tixanı yağlı,
yaşgözü Aysoniği ayaxlarını ezci.
İnci u izıniği saşlarıla Aniği ayaxlarını quratı,
mödeqalı ulıra datli isgengen yağ salıberci.
39 Aysonı öyüne çıxrığan Fariseyçüx munı görğende,
iz gövnünde “Bu Kişçüx peyğember volsa,
izığa değgucı kem ma nisgi qadınkişor volğanını bilğa.
Şu qadınkişçüx gunıhacıdır” edici.
40 Ayso aña “Simun,
Men saña yenşağusor var” edici.
U Fariseyçüx “Ya Mutalim,
Sen yenşı” edici.
41 “Bur kişordan işgi kiş helli uçılamış.
Burına beş yüz dinar uçı vara,
nene burına elli dinar.
42 U işgisı da uçısını xollanmacı,
uçılıbiğüci hem u işgisıniği uçısını da afu etci.
İnci u işgisından qaysı anı artux söyünga ra?”
43 Simun “Men vaxsa,
uçısını artux afu etilğen kişçüx” ede cavap verci.
Ayso aña “Sen yenşığanı idır” edici.
44 İnci Ayso u qadınkişçüxe çüranı,
Simuna vaxı beli edici:
“Sen bu qadınkişçüxnı görür mu?
Men siniği öyüñe gelse,
sen Miniği ayaxlarımnı yuğına su vermacı.
Ese bu qadınkişçüx yaşgözüla Miniği ayaxlarımnı ezqalı,
saşlarıla qurutcı.
45 Sen Minı mödemacı,
ese bu qadınkişçüx Men öye girğenden Miniği ayaxlarımnı möde durmacı.
46 Sen Miniği başıma zeytun yağ salıbermacı,
ese bu qadınkişçüx ayaxlarıma datli isgengen yağ salıberci.
47 Bu sebepden Men saña yenşağı:
bu qadınkişçüxniği artuçüx volğan gunıhalarını afu etci.
Aña göre aniği söyünganı hem artuxdır.
Ese gunıhalarını az afu etilğen kişniği söyünganı hem azdır.”
48 İnci Ayso u qadınkişçüxe “Siniği gunıhalarıñnı afu etci” edici.
49 Aysola şırıda burlığı oturğucılar izlerniği arasında “Bu Kişçüx kem'a ri,
gunıhalarnı da afu etgen?”
edeşci.
50 Ayso u qadınkişçüxe “İmanıñ sinı cuulacı,
sen pinnençüx var” edici.