Aysoniği ardına ireşgen qadınkişler
8
Andan ardı Ayso her şeherde ma ağılda ilanı,
Xudaniği Vañgosıniği Yaxşı Xebarını yenşıbirı vası etci.
On işgi resul Ala burlığı var,
2 hem da arı-emesganı ağırğanından ma ağrıxlardan ornı engen qadınkiş bici var;
ularniği arasında poñından cin yıdı çıxqan Mağdaladağı Merem,
3 Herodesniği öyünı iyitgucı Kuzaniği kinı Yoxanna,
dağı Susanna ma başqı yarağor qadınkişler hem var.
Bu çosı qadınkişler izlerniği neychanlarıla Aysoğa ma Aniği muritlarına gullacı.
Yazılğan urlux bifañı
4 Limañ kişxobanor yığılaşı ma her şeherden gelğen kişler Aysoniği yanına yığıngelğende,
Ayso ulıra bifañor qoyberci:
5 “İxin exgen kişor urlux yazma varmış.
U urluxlarını yazqanda burisılar yol qırğına inı,
ularnı ayax cüyüne basmış,
asmandağı quşlar gilı ularnı yimiş.
6 Burisılar daş yere enmiş,
ular çañnı nem yoxmi qurmış.
7 Burisılar tigenler arasına enmiş,
tigenler urluxla burlığı çañnı ularnı boğmış.
8 Başqasılar ese yaxşı torıxqa inı,
ular çañnı exganından aşlıx artuxlığına yüz gez gimiş.”
Ayso bularnı yenşıqalı “İşteğen qulax volğucı munı diñniği!”
ede zıqıracı.
9 Muritları Aysoğa bu bifañniği manisı nañ edeğanını sorcı.
10 U beli edici:
“Xudaniği Vañgosıniği omilarını bilğüsını selere verci.
Ese başqasılar
‘Öşürse da ular görmiği,
İştese da ular olanmağı’
ede Men bifañla yenşabur.
11 “Bifañçüxniği manisı budır:
urlux Xudaniği sözüdır.
12 Yol qırğına enganılar söznı işteğen kişlerdır.
Ese ardi iblis gilı,
u kişçüxler iman etqalı dacuu etilquğa ede,
ularniği yirixlarından söznı ahbarba.
13 Daş yere enganılar söznı işteğende galaçüx zeliğücidır.
Ese ulıra özex yoxdır,
ular aardı yılıqalı çüse etgen vaxda imandan garlınar.
14 Tigenler arasına enganılar bulardır:
söznı işteqalı ular otura-otura hayatniği qımları,
seybeları ma rahatları ularnı boğar.
Ular pişgen yimiş durmas.
15 Yaxşı torıxqa enganılar söznı işteqalı,
anı sadiq ma yaxşı yirixde yığqucıdır.
Ular rınneyla yimiş durar.
Çıralux bifañı
16 “Kem volsa da çıraluxnı deşdarı anı saxıtla örtmes,
choñniği cüyüne hem qoymas;
ese girgiğüciler yaruxnı görği ede,
anı çıralux teyzı iştına qoyar.
17 Yaşınqan işor aşgırığa çıxgimeğanı yoxdır,
yaşırğan işor yaruxqa çıxgimeğanı ma anı bilmeğanı hem yoxdır.
18 Eli etgenniği seler niçixli diñnengusına sugu et;
neğe dese qaysı kişe volsa,
aña dağı artux verer;
ese qaysı kişe yoxmısa,
izığa var edeğanını hem andan ahbırar.”
Aysoniği icası ma iniları
19 Aysoniği icası ma iniları Anı vaxma gelci.
Ese kiş artux volğanniği,
ular Aniği yanına varınmacı.
20 Aysoğa xeber virı “Eh iciñ ma inilarıñ daşında tixanı,
Sinı görqusı giba” edici.
21 Ayso ulıra “Xudaniği sözünı diñneqalı etgucılar Miniği icim ma gagı-inilarımdır” ede cavap verci.
Ayso boğnax yelnı diñdirğanı
22 Bur gün Ayso İzıniği muritlarıla burlığı kimu bura çıxı,
ulıra “İler gölniği ele yanına ötbıral” edici.
İnci ular terenci.
23 Ular kimunı dezgetgende,
Ayso uxlacı.
Gölde boğnax yel xotı kimuçüxe su dolgilı,
ular dancın yıllıncı.
24 Muritları varı Aysonı oyatı “Usdat,
Usdat,
ipsem ülbur ya!”
edici.
Ayso oyanqalı yelnı ma qaynığan sularnı xalacı,
yel ma çalğun diñı emonçüx volcı.
25 Ayso muritlarına “Selerniği imanıñ qali?”
edici.
Ular xorğı heyran volı,
bur-burlarına “Bu kem'a ri?
U yele ma suğa da emir verse,
ular hem aniği gahcasını diñneğen!”
edeşci.
Pirı çutqan kişornı voldurğanı
26 Ular kimuğa otarı,
Celileniği duymende volğan Gerasa kişniği zimanına gelci.
27 Ayso kimudan göl qırğına çıxqanda ma,
şu şeherdiği pirı çutqan kişor uçıracı.
U kişçüx biqırıx giymi ma öyde oturmi,
tebet şoldaxlarda oturqalı uzaxlığına bici volmış.
28 U kişçüx Aysonı görğende ma,
Aniği ilinde yükünqalı ününı xıddiçüx çıxarı “Ey Ayso,
Bixicüğü Xudaniği Oğlı,
mila Sen nañ etgur ri?
Men Saña yarılğı,
Sen minı bur azaplıma!”
ede zıqıracı;
29 neğe dese Ayso şu arı emesgen ruxuçüxe u kişçüxden çıxgiğüsını emir etci.
Bu ruxu u kişçüxnı yarağor gez çutmış.
Kişçüxnı sıncırla ma cağırcaxla bağlamışda anı da gözlibaçı,
sıncırlarını u cadı,
cin anı kiş oturmığan zimene sürbarba.
30 Ayso aña “Siniği adıñ nañdır ri?”
ede sorcı.
Kişçüxniği işine cin yarağor girğenniği,
u “Miniği adım Xobandır” ede cavap verci.
31 Cinçüxler izlernı cüy yoxqan tüçüxe varğusını emir etquğa ede Aysoğa yarılcı.
32 Anda dağ cambasında yarağor volğan doñus sürümornı kütganı vara.
Cinçüxler şu doñuslarniği işine girğine kuxan bur ver ede Aysoğa yarılcı.
Ayso ulıra kuxan verci.
33 Cinçüxler u kişçüxden çıxı,
doñusçüxlerniği işine girci.
İnci u doñus sürüm dağ cambasından aşaxqa göl işine cömne,
suğa boğalı ülci.
34 Doñus kütgucılar bu çıxqan işnı görğende,
qaşbarı şeherde ma ağıllarda şu xebernı yenşıberci.
35 Xalqılar bu çıxqan işnı öşürme gelci.
Ular Aysoniği yanına gelse,
poñından cinler çıxqan kişçüx biqırıx giymişde,
lyañzınlanı Aysoniği ayaxları ilinde zoğzıba,
inci ular xorğacı.
36 Anda görğüciler pirı çutqan kişçüxnı niçixli voldurğanını xalqığa yenşıberci.
37 Gerasa zimendiği tönen-qırğındağı xalqı man cıxıñ xorğığanniği,
ular Aysonı izlerniği yanından bur garlanduğu ede yarılcı;
eli etgennniği Ayso kimuğa çıxı andan yancı.
38-39 Poñından cin çıxqan kişçüx Aysoniği yanında qalğına vulı Aña yarılcı.
Ese Ayso aña “Öyüñe yandıvar,
Xuda saña nañ etganını yenşıdıver” ede anı dohulıyüreci.
U kişçüx varqalı,
izığa Ayso nañ etganını püştün şeherde yenşıberci.
Anornı dirildirğanı ma qadınkişornı voldurğanı
40 Ayso yangelğende kişxoban Aña güyüğenniği,
ular Anı zelici.
41 U vaxda andağı eybadet-öyniği dambası Yayir diğen kişor gelci.
U Aysoniği ayaxlarıniği ilinde yükanı,
izıniği öyüne bur gir ede Aña yarılcı;
42 neğe dese u kişçüxniği burçüx balası,
on işgi yaş kemasor volğan qızı vaxına yetmiş.
Ayso aña varğanda,
kişxobanlar Anı qısdacı.
43 Anda qan engen ağrıx on işgi yıl ağırğan qadınkişor volcı.
U izığa volğanornı ağrıx vaxqına carı dosmışçı,
kem volsa da anı voldurunmacı.
44 Bu qadınkişçüx Aysoniği ardından gilı,
Aniği xantarıniği ucını değgende ma,
izıniği qan enganı dego durcı.
45 Ayso “Maña değgucı kemdır ri?”
ede sorcı.
Ese yogosı anı başa almacı.
Petrus “Usdat,
kişxobanlar Siniği tönen-qırğıñda volı,
Sinı qısdıba ra” edici.
46 Ese Ayso “Maña kemor değci,
Menden küş çıxbığanını men bilci” edici.
47 U qadınkişçüx yaşırınmağusını görğende,
tıdırıqalı Aysoniği iline gilı yükünci.
U heme kişlerniği ilinde izı neğe Aysoğa değganını ma izını niçixli dego voldurğanını yenşıberci.
48 Ayso aña “Qızım,
imanıñ sinı cuulacı,
sen pinnençüx var” edici.
49 Ayso dağı gahcı yenşabur ma,
eybadet-öyniği şüedunıniği öyünden kişor gilı “Qızıñ kuxun volcı;
inci mutalimnı enkix etme” edici.
50 Ese Ayso munı işteğende eybadet-öyniği şüedunına “Xorğıma,
zının iman et,
qızıñ ornı ener” edici.
51 Ayso u kişçüxniği öyüne gelğende İzıla Petrusnı,
Yaxıyını,
Yaqubinı ma anaçüxniği atınasından daşı kem volsını işine giğirmacı.
52 Heme kişler anaçüxe vulı yağlı yas etba.
Ese Ayso “Yağlıma,
u ülmamış,
u uxlamış” edici.
53 Ular anaçüx ülğanını bilı,
Aysonı külüşci.
54 Ayso ese anaçüxniği ilını çutı “Qızım,
xot!”
ede çıxracı.
55 Anaçüxniği ruxusı yangilı,
u dego tixinci.
Ayso anaçüxe lemi işirğüsını ulıra emir verci.
56 Anaçüxniği atınasına şıça volcı.
Ese Ayso bu çıxqan işnı bur kişe da yenşıbermiğüsını ulıra emir verci.