Ayso dovu qılğusını örğetganı
11
Bur gez Ayso bur yürde dovu qılbur;
U dovusını qılı volqalı,
muritlarından burı Aña “Ya Rab,
Yaxıyı izıniği muritlarına örğetgen kema,
Sen hem pisere dovu qılğusını bur örğet” edici.
2 Ayso ulıra beli edici:
“Seler dovu qılğanda beli ede:
Ey Aba,
Siniği adıñ muqaddes volğı,
Siniği Vañgoñ giği.
3 İpsemniği günlüx emiğimnı
Her gün ipseme bur ver.
4 Pisem izımlıra gunıha etgen her kişnı afu etgen kema,
Sen hem ipsemniği gunıhalarımnı bur afu et.
Pisernı çüseğe hem bur çirme.”
5 Ayso ulıra beli edici:
“Selerniği arasıñdan keme yarıbacor volı,
u da yarım gecide yarıbacasıniği yanına varı ‘Yarıbaca,
maña emex üsh uçılıdıver.
6 Miniği qo çıxqan yaxşı-yürüm öyüme gimiş,
aniği iline qoybiğüsı maña heşbeşor yoxdır’ edese,
7 aniği yarıbacası işinden ‘Minı enkix etme.
Qomnı dıñnacı,
balılarım hem mila söğüde yatcı.
Men xotı saña heşbeşor verinmeğa’ ede cavap verer ri?
8 Men selere yenşağı:
u ala yarıbacı volğan sebebinden xotqalı vermese da,
u sıxlanı keleğen sebebinden da xotı nehçi kelese aña verer.
9 Men selere yenşağı:
kele,
selere verer;
işde,
seler datar;
qonı sholı,
selere aşberer.
10 Neğe dese her keliğüciğe değer,
işdiğüci datar,
qonı sholağucığa aşberer.
11 Selerniği arasıñda qaysı aborniği oğlı andan balux kelese,
balux ornına u aña yılın verer ri?
12 Yumuta kelese,
u aña cacı verer ri?
13 Seler yemen volğucılar iñsılarniği balılarıña yaxşı vocannı viğüsını bilse,
selerniği asmandağı Abıñ Muqaddes Ruxunı İzıdan keliğücilere yohodiğine vermeğa ru?”
Ayso ma Bağal-Zebul
14 Ayso kişordan yabı eğen cin bur qolı çıxırcı.
Cinçüx çıxqanda ma,
yabı kişçüx gahcı yenşacı,
bu kişxobanlıra heyran volcı.
15 Ese ulardan burisılar “U cinlerniği dambası Bağal-Zebulniği küşüla cinlernı qolı çıxırba” edici.
16 Başqasılar ese Aysonı shıdañlı,
asmandan gelğen alyamet bur görğesdıver ede kelici.
17 Ayso ese ularniği sumurlaşını bilı,
ulıra beli edici:
“İz işinde bölengen heme vañgo yıxılar,
iz işinde bölengen heme öy dağılar.
18 Sheytan hem iz işinde bölense,
aniği vañgosı niçix tixinga ri?
Seler Minı Bağal-Zebulniği küşüla cinlernı qolıba deba.
19 Men Bağal-Zebulniği küşüla cinlernı qolısa,
ene selerniği kişlarıñ kemniği küşüla cinlernı qolabur ri?
Bu sebepden ular selere qazuy volar.
20 Men Xudaniği küşülaa cinlernı qolısa,
Xudaniği Vañgosı selerniği iştıña gelci.
21 Küş volğan kişor vuçını çutı izıniği öyünı sıxlısa,
aniği neychanı pinnençüx qalar.
22 Ese andan da küş volğan kişor gilı aña çıdısa,
u aniği kolanqan vuçısını andan ahbarı,
iz çixbarğan vocanlarını ülüşer.
23 Mila burlığı volmağucı Maña axqurlabur,
Mila burlığı yığmağucı dağıtbur.
24 “Arı emesgen ruxu kişordan çıxqalı,
qurı yerlerde ilanı diñgusı yüror işde datmığanda,
u ‘Men izım çıxgelğen öyüme yanbarğur’ eder.
25 U aña yangelse,
anı sürğanını ma cüncüçüx yığışdırğanını görer.
26 İnci u varı izığa vaxqan da yemen volğan ruxu yıdı başlıgilı,
öyçüxe girı anda oturar.
U kişçüxniği ardiği çınkoñı iliğinden dağı yemen volar.”
27 Ayso bu gahcılarnı yenşığanda,
kişxoban arasından qadınkişor ününı çıxarı “Sinı doğqucı ma Sinı emdirğüci bur bextli'a ri!”
edici.
28 Ese Ayso aña “Xudaniği sözünı diñneqalı zullağucılar yoho bextlidır!”
edici.
Yunus peyğemberniği alyamitı
29 Kişxobanlar yığılaşı artuxlanqanda,
Ayso beli edici:
“Bu goñyındağı kişler yemen goñyındağı kişa.
Ular da alyamet keleba,
ese ulıra Yunusniği alyamitından başqı alyamet bur da görğesbermes.
30 Noma Yunus Nineva kişlere alyamet volğanka,
Adam Oğlı hem bu goñyındağı kişlere alyamet volar.
31 Nanbangediği qadınkiş xoñshoñ qiyamet güne bu goñyındağı kişlerla burlığı xotgilı ulıra hukun çıxırar,
neğe dese u qadınkiş xoñshoñçüx Süleymanniği aqılli gahcasını diñnengine vulı,
zimenniği ucı-qırğından gelci.
Öşür,
munda Süleymandan dağı iştında Volğucor var.
32 Nineva kişler qiyamet güne bu goñyındağı kişlerla burlığı xotgilı,
bu goñyındağı kişlere hukun çıxırar,
neğe dese Nineva kişler Yunusniği vasısından töbe etci.
Öşür,
munda Yunusdan dağı iştında Volğucor var.
Poñdağı çıralux
33 “Çıraluxnı deşdarı,
anı yaşınqan yürüne mu kurı cüyüne qoyğucı yoxdır;
ese girgiğüciler yaruxnı görği ede,
anı çıralux teyzı iştına qoyar.
34 Poñıñniği çıraluğu gözüñdır.
Gözüñ sıx volsa,
püştün poñıñ yaruxdır;
gözüñ sıx volmısa,
püştün poñıñ qarıñqudır.
35 Eli etgenniği iyitdığı,
sende volğan ‘yarux’ qarıñqu volmağı.
36 Püştün poñıñ yarux volı qarıñqu yürü yoxmısa,
çıralux saña yarux saşqandağı kema,
püştün poñıñ yarux volar.”
Selere belyodır, Fariseyler ma qanuncılar!
37 Ayso gahcı yenşığanda,
Fariseyor Anı öyüne lemi işme çıxracı.
U işine girı şırı yanına oturcı.
38 Ayso işgenden ili ocını yumığanını Fariseyçüx görü,
aña heyran volcı.
39 Rab aña beli edici:
“İnci seler Fariseyler biyzıniği ma toxniği daşını aratır,
ese selerniği işiñde aşgözlüx ma yemenlixla dolba.
40 Ey içi-arı-emesgenler!
Daşını yasağucı işinı hem yasımacı mi?
41 Seler saxıtıñniği işinde volğanını sedeqe verça,
nañkirix selere arı volar.
42 “Selere belyodır,
ey Fariseyler!
Seler boxeden,
miyıxşañdan ma heme yaşdan burını viba,
ese adaletnı ma Xudaniği açışqanını seler golla'uxua.
Bularnı seler etgu keler,
ese başqasılarnı hem şıqıtsa yarımas.
43 Selere belyodır,
ey Fariseyler!
Seler eybadet-öyde hörmet ornığa ma cıshıda selere salim verğine söyünba.
44 Selere belyodır!
Seler to tixmeğen tebet kema,
kişler bilmiçüx iştında yürba.”
45 Qanuncılardan burı Aysoğa “Mutalim,
Sen bularnı yenşı ipsemnı hem yacındırbur” edici.
46 Ayso beli edici:
“Selere hem belyodır,
ey qanuncılar!
Neğe dese seler ağır yüxlernı kişlere yüxlebirı,
izıñlar u yüxlere burmaxor da değmeğa.
47 Selere belyodır!
Neğe dese seler peyğemberlerniği tebitını yasıbaçı,
ularnı üldürğüci selerniği ata-babılarıñdır.
48 Eli etgenniği seler şahitdır,
ata-babılarıñ etgen işlarına seler dollabur;
neğe dese ular bur yüründen peyğemberlernı üldürci,
seler nene bur yüründen ularniği tebitını yasıba.
49 Bu sebepden Xudaniği aqlı ‘Men ulıra peyğemberlernı ma resullarnı dohulıyüreğür,
ulardan burisılarnı ular üldürer,
burisılarnı ular zular’ edici.
50-51 Eli etgenniği Habilniği qanından qurbanguniği ma eybadet-sarıniği arasında üldürülğen Zekeriyaniği qanına yetgoñ,
dünyanı yarıtqandan şorlatqan heme peyğemberlerniği qanını bu goñyındağı kişlerden keliğüsıdır.
İdır,
Men selere yenşağı:
ularnı bu goñyındağı kişlerden keler.
52 Selere belyodır,
ey qanuncılar!
Seler erlinniği kiratını ahbarı,
izıñlar girmacı,
girğüsı giğücilernı hem tuscı.”