Goho qadınkiş ma doğrı emesgen qazuy bifañı
18
Ayso ulıra geşgünçüx dovu qılğu keliğüsını ma yirix yadaşmağusını yenşı,
bifañ bur qoybirı
2 beli edici:
“Bur şeherorda Xudadan xorğımığan ma kişlere hörmet etmeğen qazuyor volmış.
3 Şu şeherçüxde goho qadınkişor hem bur volmış,
u geşgünçüx qazuyçüxniği yanına gilı ‘Sen miniği cayamdan maña gundañ bur qoydıver’ ede yarılmış.
4 Qazuyçüx anı eli yarağor gez etbermamış.
Ardi u iz-izığa ‘Men Xudadan xorğımısa da,
kişlere hörmet etmese da,
5 bu gohoçüx geşgünçüx minı coğlıma gelğenniği,
men aña gundañ qoybiquğu;
edemese u geşgünçüx gilı,
başımnı usundurquğa’ edimiş.”
6 Rab nene beli edici:
“Bu doğrı emesgen qazuy nañ edeğanını seler bur diñnen.
7 Xuda İzığa gecis-güntüs yarılğan,
İzı dañnığan kişlarına gundañ qoybermes su?
Ularnı artuğunda güyüter ro?
8 Men selere munı yenşıbiği:
Xuda dego ulıra gundañ qoyberer.
Ese Adam Oğlı gelğende,
u zimen iştında Xudağa etgen iman datqa ro?”
Farisey ma shuy yığqucı bifañı
9 İzler doğrıdır ede yiriğine alı,
başqı kişlernı görenmiğücilere Ayso bu bifañnı qoyberci:
10 “Kiş işgi eybadet-sarığa dovu qılma varmış,
burı Fariseya,
nene burı shuy yığquca.
11 Fariseyçüx tixanı iz-izığa dovu qılı ‘Ey Xuda,
men başqı kişler — çozha etgucılar,
yemen etgucılar,
zına etgucılar,
ya da bu shuy yığqucıçüx kema volmığanıma men Saña shükür etbur.
12 Men her zhumada rozı işgi gez çutbur,
maña girgiğanordan men ondan burını çıxırbur’ edimiş.
13 U shuy yığqucıçüx ese yıraçüx tixanı,
başını damnı asmana da öşürünmi,
izıniği köxriğinı chulı ‘Ey Xuda!
Men bu gunıhacığa Sen rehim bur görğesduğu!’
edimiş.
14 Men selere yenşağı:
bu işgisından doğrılanqucı Fariseyçüx emesdır,
ese u shuy yığqucıçüx doğrılanı,
iz öyüne varmış;
neğe dese izını ulı etgucornı aşax eter,
izını aşax çutqucornı ulı eter.”
Ayso balılıra yaxşı-niyit qılberğanı
15 Kişler aybalılarına Ayso bur değgi ede,
ularnı Aysoniği yanına ahgelci;
muritları munı görğende ularnı xalacı.
16 Ese Ayso balılarnı yanına çıxrı “Balılarnı tusma,
ular Miniği yanıma giği!
Neğe dese Xudaniği Vañgosı belisgilerniğidır.
17 Men shıxoçüx selere yenşağı:
kem Xudaniği Vañgosını balı kema zelemese,
u aña xaxo girinmes” edici.
Seybe ma ebedi can
18 Bur beğor Aysoğa “Ey yaxşı Mutalim,
men nañ etse,
maña ebedi can değga ri?”
ede sorcı.
19 Ayso aña “Minı sen neğe yaxşı edibur ri?
Xudadan başqı yaxşısı bur da yoxdır.
20 Emirlernı sen bilir:
‘Zına etme,
kiş üldürme,
oğrı etme,
yalğan şahitlix etme,
atınaña şoshun et’ ” ede cavap verci.
21 U kişçüx “Bu çosı aricüğünı men kiçi vaxdan zullabur” edici.
22 Ayso munı işteğende aña vaxı “Saña dağı bur iş chalanba:
sen izıña volğanornı satda yox kişlere ülüşdıver,
saña asmanda seybe volar.
İnci sen gelde Miniği ardıma ireş” edici.
23 U kişçüx cıxıñ bar volğanniği,
bu gahcılarnı işteğende u giñnıncı.
24 Ayso u kişçüxniği cıxıñ uslığanını görğende “Bar kişler Xudaniği Vañgosına girse nehçi enkixa ri!
25 Döyü yiğniniği gözünden ötse da,
bar kiş Xudaniği Vañgosına girğine vaxqan da mundañdır” edici.
26 Munı iştiğüciler “Eli volsa kemnı dacuu etinga ri?”
edici.
27 Ayso “İnsana dese etinmeğen işler Xudağa dese etingusıdır” edici.
28 Petrus Aña “Öşür,
piser volğanornı cağı Siniği ardıña ireşci” edici.
29-30 Ayso ulıra “Men shıxoçüx selere yenşağı:
Xudaniği Vañgosına vulı öyünı,
kinını,
gagı-inilarını,
atınasını ya da balılarını çöyğüciğe bu çoxurğı dünyada cıxıñ artux değer,
giğüsı dünyada hem ebedi can değer” edici.
Ayso İz ülü dirilğüsını üçünci gez bildirğanı
31 Ayso onişgilernı başlıbarı ulıra “Öşür,
iler Yerusalime çıxbarbur,
peyğemberler Adam Oğlını pişteğen işler yogosı çıxar.
32 Adam Oğlını daşı milletlere colıberer.
Ular Anı kemencılar,
peyzhi eter,
Aña tüxürcax tüxürberer,
33 dağı da Anı qamcula deyer,
üldürer;
ese üçünci güne U diriler” edici.
34 Ese muritları bu işlerden burnı da olanmacı.
Bu sözlernı guguş gelse ulardan yaşırmış,
ular Aniği yenşığanını olanmacı.
Qorı kişorniği gözünı gördürğanı
35 Ayso Yerikoğa yaxılıgelğende,
qorı kişor yol qırğında otarı keleba.
36 U kişçüx iz yanından kişxoban yürbığanını işteğende,
nañ iş çıxqanını kişlere añnaşcı.
37 Ular aña “Nasıra kiş Ayso mundan ötbarba” ede yenşıberci.
38 İnci u “Ey Davudi Oğlı Ayso!
Maña rehim bur et ya!”
ede zıqıracı.
39 İline yürbarğucılar anı çolımağı ede öhrici,
u ese ününı yohodiğine çıxarı “Ey Davudi Oğlı!
Maña rehim bur et ya!”
ede zıqıracı.
40 Ayso diñqalı u kişçüxnı İzıniği yanına başlıgiğüsını emir etci.
Anı yanına başlıgelğende,
Ayso aña
41 “Sen Minı saña nañ ettirqusı gilır ri?”
ede sorcı.
U kişçüx “Ey Rab,
miniği gözlarım bur görği” edici.
42 Ayso aña “Ya,
gözlarıñ görği,
imanıñ sinı cuulacı” edici.
43 Dego u kişçüxniği gözları görci,
u inci Xudağa şerifu itı,
Aysoniği ardına ireşci.
Munı görğen heme kişler Xudağa hamd etci.